Shanti Japam

ॐ भ॒द्रं दधा॑तु ।

ॐ । भ॒द्रं कर्णे॑भिः शृणु॒याम॑ देवाः । भ॒द्रं प॑श्येमा॒क्षभि॒र् -यज॑त्राः ।

स्थि॒रै-रङ्गै᳚-स्तुष्ठु॒वाꣳ स॑स्त॒नूभिः॑ । व्यशे॑म दे॒वहि॑तं॒ ँयदायुः॑ ।

स्व॒स्तिन॒ इन्द्रो॑ वृ॒द्धश्र॑वाः । स्व॒स्तिनः पू॒षा वि॒श्ववे॑दाः ।

स्व॒स्ति-न॒स्तार्क्ष्यो॒ अरि॑ष्टनेमिः । स्व॒स्तिनो॒ बृह॒स्पति॑र् दधातु ॥

ॐ शान्तिः॒ शान्तिः॒ शान्तिः॑ ॥

(ॐ) अथ गणपत्यथर्वशीर्.षं ँव्या᳚ख्यास्स्या॒मः ।

आं नम॑स्ते ग॒णप॑तये । त्वमे॒व प्र॒त्यक्षं॒ तत्त्व॑मसि । त्वमे॒व के॒वलं॒ कर्त्ता॑ऽसि । त्वमे॒व के॒वलं॒ धर्त्ता॑ऽसि । त्वमे॒व के॒वलं॒ हर्त्ता॑ऽसि । त्वमेव सर्वं खल्‌विदं॑ ब्रह्मा॒सि ।

त्वं साक्षा-दात्मा॑ऽसि नि॒त्यं ॥ 1

ऋ॑तं ँव॒च्मि । स॑त्यं ँव॒च्मि ॥ 2

अव॑त्वं॒ मां । अव॑व॒क्तारं᳚ । अव॑ श्रो॒तारं᳚ । अव॑दा॒तारं᳚ । अव॑धा॒तारं᳚ ।

अवानूचा-नम॑वशि॒ष्यं । अव॑प॒श्चात्ता᳚त् ।

अव॑ पु॒रस्ता᳚त् । अवोत्त॒रात्ता᳚त् । अव॑दक्षि॒णात्ता᳚त् । अव॑ चो॒द्‌र्ध्वात्ता᳚त् । अवाध॒रात्ता᳚त् ।

सर्वतोमां पाहि पाहि॑ सम॒न्तात् ॥ 3

त्वंं ँवाङ्मयस्त्वं॑ चिन्म॒यः ।

त्वमानन्द-मयस्त्वं॑ ब्रह्म॒मयः ।

त्वं सच्चिदानन्दा-ऽद्वि॑तीयो॒ऽसि । त्वंप्र॒त्यक्षं॒ ब्रह्मा॑सि । त्वं ज्ञानमयो विज्ञान॑मयो॒ऽसि ॥ 4

सर्वं जगदिदं त्व॑त्तो जा॒यते । सर्वं जगदिदं त्व॑त्तस्ति॒ष्ठति । सर्वं जगदिद त्वयि लय॑मे॒ष्यति । सर्वं जगदिदं त्वयि॑ प्रत्ये॒ति ।

त्वं भूमि-रापो-ऽनलो-ऽनि॑लो न॒भः । त्वं चत्वारि वा᳚क्पदा॒नि ॥ 5

त्वं गु॒णत्र॑याती॒तः । त्वम॒वस्थात्र॑याती॒तः । त्वं दे॒हत्र॑याती॒तः । त्वं का॒लत्र॑याती॒तः । त्वं मूलाधार-स्थितो॑ऽसि नि॒त्यं । त्वं शक्तित्र॑यात्म॒कः । त्वां ँयोगिनो ध्याय॑न्ति नि॒त्यं ।

त्वं ब्रह्मा त्वं ँविष्णुस्त्वं-रुद्रस्त्व-मिन्द्रस्त्व-मग्निस्त्वं ँ-वायुस्त्वं सूर्यस्त्वं चन्द्रमास्त्वं ब्रह्म॒ भूर्भुव॒स्स्वरों ॥ 6

ग॒णादिं᳚ (ग॒णादिं॑) पूर्व॑-मुच्चा॒र्य॒ व॒र्णादिं᳚ (व॒र्णादिं॑) तदन॒न्तरं ।

अनुस्वारः प॑रत॒रः । अर्धे᳚न्दु-ल॒सितं । तारे॑ण ऋ॒द्धं । एतत्तव-मनु॑स्वरू॒पं । गकारः पू᳚र्वरू॒पं । अकारो मद्ध्य॑म रू॒पं । अनुस्वार श्चा᳚न्त्य रू॒पं । बिन्दु रुत्त॑र रू॒पं । नादः॑ सन्धा॒नं । सꣳहि॑ता स॒न्धिः ।

सैषा गणे॑श वि॒द्या । गण॑क ऋ॒षिः । निचृद्गाय॑त्री च्छ॒न्दः ।

(श्री महा) गणपतिर्-दव॒ता । ॥ 7

ॐ गं गणपतये॒ नमः॑ ॥

एक द॒न्ताय॑ वि॒द्महे॑ वक्र तु॒ण्डाय॑ धीमहि ।

तन्नो॑ दन्तिः (दन्ती) प्रचो॒दया᳚त्॒ (3 times) ॥ 8

ए॒क॒ द॒न्तं च॑तुर्.ह॒स्तं॒ पा॒श-म॑ङ्कुश॒ धारि॑णं । रद॑ञ्च॒ वर॑दं-ह॒स्तै॒र् बि॒भ्राणं॑ मूष॒कध्व॑जं । रक्तं ँल॒बोंद॑रं शू॒र्प॒क॒र्णकं॑ रक्त॒वास॑सं ।

रक्त॑ग॒न्धा-नु॑लिप्ता॒ङ्गं॒ र॒क्तपु॑ष्पैः सु॒पूजि॑तं । भक्ता॑नु॒कंपि॑नं दे॒वं॒ ज॒गत्का॑रण॒-मच्यु॑तं । आवि॑र्भू॒तंच॑ सृ॒ष्‌ट्या॒॒दौ॒ प्र॒कृतेः᳚ पुरु॒षात्‌प॑रं ।

एवं॑ ध्या॒यति॑यो नि॒त्यं॒ स योगी॑ योगि॒नां ँव॑रः ॥ 9

नमो व्रातपतये , नमो गणपतये , नमः प्रमथपतये, नमस्ते॑ऽस्तु लंबोदराय , एकदन्ताय ,विघ्न(वि)नाशिने , शिवसुताय, श्रीवरदमूर्त्तये॒ नमः (नमो॒ नमः॑) ॥ 10

एतदथर्वशीर्.षं ँयोऽधी॒ते । स ब्रह्मभूया॑य क॒ल्पते । स सर्व विघ्नै᳚र् -नबा॒ध्यते । स सर्वतः सुख॑मेध॒ते । स पञ्च महा पापा᳚त् प्रमु॒च्यते ।

सा॒य-म॑धीया॒नो॒ दिवसकृतं पापं॑ नाश॒यति । प्रा॒तर॑-धीया॒नो॒ रात्रिकृतं पापं॑ नाश॒यति ।

सा॒यं प्रा॒तः प्र॑युञ्जा॒नो॒ पापोऽपा॑पो भ॒वति ।

सर्वत्राधीयानो-ऽपवि॑घ्नो भ॒वति । धर्मार्त्थ-काम-मोक्षं॑ च वि॒न्दति । इद-मथर्वशीर्.ष-मशिष्याय॑ न दे॒यं । यो यदि मो॑हाद् दा॒स्यति ।

स पापी॑यान् भ॒वति । सहस्रावर्तनाद्यं ँय काम॑मधी॒ते । तं तमने॑न सा॒धयेत् ॥ 11

अनेन गणपति-म॑भिषि॒ञ्चति । सवा᳚ग्मी भ॒वति ।

चतुर्त्थ्या मन॑श्नन् ज॒पति । स विद्या॑वान् भ॒वति । इत्यथर्व॑ण-वा॒क्यं । ब्रह्माद्यावर॑णं ँवि॒द्यात् ।

न बिभेति कदा॑चने॒ति ॥ 12

यो दूर्वाङ्कु॑रैर्-य॒जति । स वैश्रवणोप॑मो भ॒वति ।

यो ला॑जैर् -य॒जति । स यशो॑वान् भ॒वति । स मेधा॑वान् भ॒वति । यो मोदक-सहस्रे॑ण य॒जति ।

स वाञ्छित-फलम॑वाप्नो॒ति । यः साज्य समि॑द्भिर् -य॒जति ।

स सर्वं ँलभते स स॑र्वं ँल॒भते ॥ 13

अष्टौ ब्राह्मणान् सम्यग्ग्रा॑हयि॒त्वा । सूर्य वर्च॑स्वी भ॒वति । सूय ग्रहे म॑हान॒द्यां॒ प्रतिमा सन्निधौ॑ वा ज॒प्त्वा । सिद्ध म॑न्त्रो भ॒वति । महा विघ्ना᳚त् प्रमु॒च्यते । महा दोषा᳚त् प्रमु॒च्यते । महा प्रत्यवाया᳚त् प्रमु॒च्यते । महा पापा᳚त् प्रमु॒च्यते ।

स सर्व विद्भवति स सर्व॑ विद्भ॒वति ।

य ए॒वंं ँवेद॑ । इत्यु॑प॒निष॑त् ॥ 14

स॒हना॑ववतु । स॒हनौ॑भुनक्तु । स॒हवी॒र्यं॑ करवावहै । त॒ज॒स्विना॒ वधी॑तमस्तु॒मा वि॑द्विषा॒वहै᳚ ॥

ॐ शान्तिः॒ शान्तिः॒ शान्तिः॑॥

ॐ भ॒द्रं दधा॑तु । ॐ भ॒द्रं कर्णे॑भिः शृणु॒याम॑ देवाः । भ॒द्रं प॑श्येमा॒क्षभिर् यज॑त्राः । स्थि॒रै-रङ्गै᳚-स्तुष्ठु॒वाꣳ स॑स्त॒नूभिः॑ । व्यशे॑म दे॒वहि॑तं ँयदायुः॑ । स्व॒स्तिन॒ इन्द्रो वृ॒द्धश्र॑वाः । स्व॒स्तिनः॑ पू॒षा वि॒श्ववे॑दाः ।

स्व॒स्ति-न॒स्तार्क्ष्यो॒ अरि॑ष्टनेमिः ।

स्व॒स्तिनो॒ बृह॒स्पति॑र् दधातु ॥

ॐ शान्तिः॒ शान्तिः॒ शान्तिः॑ ॥

ॐ । अ॒ग्निमी᳚ळे पु॒रोहि॑तं य॒ज्ञस्य॑ दे॒वमृ॒त्विजं᳚ । होता᳚रं रत्न॒ धात॑मं ।

इ॒षेत्वो॒र्जेत्वा॑ वा॒यव॑स्स्थो पा॒यव॑स्स्थ दे॒वो व॑स्सवि॒ता प्रार्प॑यतु॒

श्रेष्ठ॑तमाय॒ कर्म॑णे ।

अग्न॒ आया॑हि वी॒तये॑ गृणा॒नो ह॒व्यदा॑तये । निहोता॑ सथ्सि ब॒र्.हिषि॑ ।

शन्नो॑ दे॒वीर॒भिष्ट॑य॒ आपो॑ भवन्तु पी॒तये᳚ । शं ँयोर॒भि स्र॑वन्तुनः ॥ 1

कृ॒णु॒ष्व पाजः॒ प्रसि॑ति॒न्न पृ॒थ्वींं ँया॒हि

राजे॒ वाम॑वा॒ꣳ॒ इभे॑ न । त्रृ॒ष्वीमनु॒ प्रसि॑तिं-द्रूणा॒नोऽस्ता॑ऽसि॒ विद्ध्य॑ र॒क्षस॒ स्तपि॑ष्ठैः ।

तव॑भ्र॒मास॑ आशु॒या प॑तं॒त्यनु॑ स्पृश-धृष॒ता शोशु॑चानः । तपूᳺ॑ष्यग्ने जु॒ह्वा॑पतं॒-गानस॑न्दितो॒ विसृ॑ज॒ विष्व॑ गु॒ल्काः ।

प्रति॒स्पशो॒ विसृ॑ज॒-तूर्णि॑ तमो॒ भवा॑ पा॒युर्वि॒शो अ॒स्या अद॑ब्धः ॥ 2

यो नो॑ दू॒रे अ॒घशꣳ॑सो॒यो अन्त्यग्ने॒ माकि॑ष्टे॒ व्यथि॒रा द॑धर्.षीत् । उद॑ग्नेतिष्ठ॒ प्रत्या त॑नुष्व॒न्य॑-मित्राꣳ॑ ओषता-त्तिग्महेते ।

यो नो॒ अरा॑तिꣳ समिधान च॒क्रे नी॒चातंध॑क्ष्यत॒ सन्न शुष्कं᳚ । ऊ॒द्‌र्ध्वो भ॑व॒ प्रति॑वि॒द्ध्या-द्ध्य॒स्मदा॒ विष्कृ॑णुष्व॒ दैव्या᳚न्यग्ने ।

अव॑स्थि॒रा त॑नुहि यातु॒ जूनां᳚ जा॒मिमजा॑मिं॒ प्रमृ॑णीहि॒ शत्रून्॑ ॥ 3

स ते॑ जानाति सुम॒तिं ँय॑विष्ठ॒य ईव॑ते॒ ब्रह्म॑णे गा॒तुमैर॑त् । विश्वा᳚न्यस्मै सु॒दिना॑नि रा॒यो द्यु॒म्नान्य॒र्यो विदुरो॑ अ॒भिद्यौ᳚त् । सेद॑ग्ने अस्तु सु॒भग॑ स्सु॒दानु॒र्-यस्त्वा॒ नित्ये॑न ह॒विषा॒य

उ॒क्थैः । पिप्री॑षति॒स्व आयु॑षि दुरो॒णे विश्वेद॑स्मै सु॒दिना॒-साऽस॑दि॒ष्टिः । अर्चा॑मि ते सुम॒तिं घोष्य॒र्वाख्-सन्ते॑ वा॒ वा ता॑ जरता मि॒यंगीः ॥ 4

स्वश्वा᳚स्त्वा सु॒रथा॑ मर्जये-मा॒स्मे क्ष॒त्राणि॑ धारये॒र-नु॒द्यून् । इ॒हत्वा॒ भूर्याच॑रे॒ दुप॒त्मन्-दोषा॑वस्तर् दीदि॒वाꣳ स॒मनु॒द्यून् ।

क्रीड॑न्तस्त्वा सु॒मन॑-सस्सपेमा॒भि द्यु॒म्ना त॑स्थि॒वाꣳसो॒ जना॑नां । यस्त्वा॒-स्वश्व॑स्सु-हिर॒ण्यो अ॑ग्न उप॒याति॒ वसु॑मता॒ रथे॑न । तस्य॑ त्रा॒ता-भ॑वसि॒ तस्य॒ सखा॒ यस्त॑ आति॒थ्य मा॑नु॒षग्

जुजो॑षत् ॥ 5

म॒होरु॑जामि ब॒न्धुता॒ वचो॑भि॒स्तन्मा॑ पि॒तुर्गोत॑मा॒द-न्वि॑याय । त्वन्नो॑ अ॒स्य वच॑स-श्चिकिद्धि॒ होत॑र्यविष्ठ सुक्रतो॒ दमू॑नाः ।

अस्व॑प्न जस्त॒रण॑य स्सु॒शेवा॒ अत॑न्द्रा सोऽवृ॒का अश्र॑मिष्ठाः । तेपा॒यवः॑ स॒द्ध्रिय॑ञ्चो नि॒षद्याग्ने॒ तव॑नः पान्त्वमूर ।

ये पा॒यवो॑ मामते॒यंते॑ अग्ने॒ पश्य॑न्तो अ॒न्धंदु॑रि॒ताद र॑क्षन्न् ।

र॒रक्ष॒तान्थ् सु॒कृतो॑ वि॒श्ववे॑दा॒ दिफ्स॑न्त॒ इद्रि॒पवो॒ नाह॑ देभुः ॥ 6

त्वया॑ व॒यꣳ स॑ध॒न्य॑-स्त्वो-ता॒स्तव॒ प्रणी᳚त्य श्याम॒ वाजान्॑ । उ॒भा शꣳ सा॑ सूदय सत्यताते-ऽनुष्ठु॒या कृ॑णुह्य-ह्रयाण । अ॒या ते॑ अग्ने स॒मिधा॑ विधेम॒ प्रति॒स्तोमꣳ॑ श॒स्यमा॑नं गृभाय । दहा॒शसो॑ र॒क्षसः॑ पा॒ह्य॑स्मान् दृ॒हो नि॒दो मि॑त्रमहो अव॒द्यात् । र॒क्षो॒हणं॑ ँवा॒जिन॒माजि॑ घर्मि मि॒त्रं प्रथि॑ष्ठ॒-मुप॑यामि॒ शर्म॑ । शिशा॑नो अ॒ग्निः क्रतु॑भि॒-स्समि॑द्ध॒-स्सनो॒ दिवा॒ सरि॒षः पा॑तु॒नक्तं᳚ ॥ 7

विज्योति॑षा बृह॒ता भा᳚त्य॒ग्निरा॒विर् -विश्वा॑नि कृणुते महि॒त्वा ।

प्रादे॑वीर् -मा॒या स्स॑हते-दु॒रेवा॒ श्शिशी॑ते॒ शृगें॒ रक्ष॑से वि॒निक्षे᳚ ।

उ॒त स्वा॒नासो॑ दि॒विष॑न्त्व॒ग्ने स्ति॒ग्मायु॑धा॒ रक्ष॑से॒ हन्त॒ वा उ॑ ।

मदे॑ चिदस्य॒ प्ररु॑जन्ति॒ भामा॒ नव॑रन्ते परि॒बाधो॒ अदे॑वीः ॥ 8

अग्ने॑ यशस्वि॒न॒. यश॑से॒ मम॑र्प॒येन्द्रा॑वती॒-मप॑चिती मि॒हाव॑ह । अ॒यं मू॒र्द्धा प॑रमे॒ष्ठी सु॒वर्चा᳚-स्समा॒नाना॑-मुत्त॒म श्लो॑को अस्तु ।

भ॒द्रं पश्य॑न्त॒ उप॑सेदु॒रग्रे॒ तपो॑दी॒क्षा-मृष॑य-स्सुव॒र्विदः॑ । ततः॑ क्ष॒त्रं बल॒मोज॑श्च जा॒तं तद॒स्मै दे॒वा अ॒भिसन्न॑-मन्तु ।

धा॒ता वि॑धा॒ता प॑र॒मोत स॒न्दृक् प्र॒जाप॑तिः परमे॒ष्ठी वि॒राजा᳚ । स्तोमा॒-श्चन्दाꣳ॑सि नि॒विदो॑म आहुरे॒तस्मै॑ रा॒ष्ट्रम॒भि-सन्न॑माम ।

अ॒भ्याव॑र्त्तद्ध्व॒-मुप॒मेत॑ सा॒कम॒यꣳ शा॒स्ता-ऽधि॑पतिर्वो अस्तु । अ॒स्य वि॒ज्ञान॒-मनु॒सꣳ-र॑भद्ध्वमि॒मं प॒श्चादनु॑ जीवाथ॒ सर्वे᳚ ॥

ॐ ॥ हिर॑ण्यवर्णाः॒ शुच॑यः पाव॒का यासु॑जा॒तः क॒श्यपो॒ यास्विन्द्रः॑ ।

अ॒ग्निं ँया गर्भं॑दधि॒रे विरू॑पा॒स्ता न॒ आप॒श्शᳺ स्यो॒ना भ॑वन्तु ॥

यासा॒ꣳ॒ राजा॒ वरु॑णो॒ याति॒ मद्ध्ये॑ सत्यानृ॒ते अ॑व॒पश्य॒न् जना॑नां ।

म॒धु॒श्चुत॒-श्शुच॑यो॒याः पा॑व॒कास्ता न॒ आप॒श्शᳺ स्यो॒ना भ॑वन्तु ॥

यासां᳚ दे॒वादि॒वि कृ॒ण्वन्ति॑ भ॒क्षं ँया अ॒न्तरि॑क्षे बहु॒धा भव॑न्ति ।

याः पृ॑थि॒वीं पय॑सो॒न्दन्ति॑ शु॒क्रास्ता न॒ आप॒श्शᳺ स्यो॒ना भ॑वन्तु ॥

शि॒वेन॑ मा॒ चक्षु॑षा पश्यताप श्शि॒वया॑ त॒नुवो-प॑स्पृशत॒ त्वच॑में ।

सर्वाꣳ॑ अ॒ग्नीꣳ र॑फ्सु॒षदो॑ हुवे वो॒ मयि॒ वर्चो॒ बल॒मोजो॒ निध॑त्त ॥

(Additional chanting for Shanti Japam -TS 5.6.1.2)

यद॒दस्सं॑ प्रय॒॒तीरहा॒॒ वन॑दता-ह॒ते ।

तस्मा॒दा न॒द्यो॑ नाम॑स्थ॒तावो॒ नामा॑नि सिन्धवः ।

यत् प्रेषि॑ता॒ वरु॑णेन॒ ताश्शीभꣳ॑ स॒मव॑ल्गत ।

तदा᳚प्नो॒-दिन्द्रो॑वो य॒ती-स्तस्मा॒-दापो॒ अनु॑ स्थन ।

अ॒प॒का॒मᳺ स्यन्द॑माना॒ अवी॑वरत वो॒ हिकं᳚ ।

इन्द्रो॑ व॒श्शक्ति॑भिर् देवी॒-स्तस्मा॒-द्वार्णाम॑वो हि॒तं ।

एको॑ दे॒वो अप्य॑तिष्ठ॒थ्-स्यन्द॑माना यथा व॒शं ।

उदा॑निषुर् -म॒हीरिति॒ तस्मा॑-दुद॒क-मु॑च्यते ।

आपो॑ भ॒द्रा घृ॒तमिदाप॑ आसुर॒ग्नी-षोमौ॑ बिभ्र॒त्याप॒ इत्ताः ।

ती॒व्रोरसो॑ मधु॒पृचा॑-मरङ्ग॒म आमा᳚ प्रा॒णेन॑ स॒हवर्च॑सा गन्न् ।

आदित्प॑श्या-म्यु॒तवा॑ श्रृणो॒-म्यामा॒ घोषो॑ गच्छति॒ वाङ्न॑ आसां ।

मन्ये॑ भेजा॒नो अ॒मृत॑स्य॒ तर्.हि॒ हिर॑ण्यवर्णा॒ अतृ॑पं ँ य॒दावः॑ ।

आपो॒ हिष्ठा म॑यो॒ भुव॒ स्तान॑ ऊ॒र्जे द॑धातन । म॒हे रणा॑य॒ चक्ष॑से ।

योवः॑ शि॒वत॑मो॒ रस॒स्तस्य॑ भाजय ते॒हनः॑ । उ॒श॒तीरि॑व मा॒तरः॑ ।

तस्मा॒ अरङ्ग॑मामवो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ।

दि॒वि श्र॑यस्वा॒न्तरि॑क्षे यतस्व पृथि॒व्या संभ॑व ब्रह्मवर्च॒स-म॑सि

ब्रह्मवर्च॒साय॑ त्वा ॥ (Additional chanting Ends)

TB 1.4.8.1 (for Para No. 1 to 6)

पव॑मान॒-स्सुव॒र्जनः॑ । प॒वित्रे॑ण॒ विच॑र्.षणिः ।

यः पोता॒ स पु॑नातु मा । पु॒नन्तु॑ मा देवज॒नाः । पु॒नन्तु॒ मन॑ वोधि॒या । पु॒नन्तु॒ विश्व॑ आ॒यवः॑ । जात॑वेदः प॒वित्र॑वत् । प॒वित्रे॑ण पुनाहि मा ।

शु॒क्रेण॑ देव॒ दीद्य॑त् । अग्ने॒ क्रत्वा॒-क्रतू॒ꣳ॒ रनु॑ ॥ 1

यत्ते॑ प॒वित्र॑-म॒र्चिषि॑ । अग्ने॒ वित॑त-मन्त॒रा । ब्रह्म॒ तेन॑ पुनीमहे । उ॒भाभ्यां᳚ देव सवितः । प॒वित्रे॑ण स॒वेन॑ च । इ॒दं ब्रह्म॑ पुनीमहे ।

वै॒श्व॒दे॒वी पु॑न॒ती दे॒व्यागा᳚त् । यस्यै॑ ब॒ह्वी-स्त॒नुवो॑ वी॒तपृ॑ष्ठाः । तया॒ मद॑न्त-स्सध॒माद्ये॑षु । व॒यᳺ स्या॑म॒ पत॑योरयी॒णां ॥ 2

वै॒श्वा॒न॒रो र॒श्मिभि॑र्मा पुनातु ।

वातः॑ प्रा॒णेने॑ षि॒रो म॑यो॒ भूः ।

द्यावा॑पृथि॒वी पय॑सा॒ पयो॑भिः । ऋ॒ताव॑री य॒ज्ञिये॑ मा पुनीतां । बृ॒हद्भि॑-स्सवि त॒स्तृभिः॑ । वर्.षि॑ष्ठैर् -देव॒मन्म॑भिः । अग्ने॒ दक्षैः᳚ पुनाहिमा ।

येन॑ दे॒वा अपु॑नत । ये नापो॑ दि॒व्यङ्कशः॑ ।

तेन॑ दि॒व्येन॒ ब्रह्म॑णा ॥ 3

इ॒दं ब्रह्म॑ पुनीमहे । यः पा॑वमा॒नी-र॒द्धयेति॑ ।

ऋषि॑भि॒-स्संभृ॑त॒ꣳ॒ रसं᳚ । सर्व॒ꣳ॒ स पू॒तम॑श्नाति । स्व॒दि॒तं मा॑त॒रिश्व॑ना । पा॒व॒मा॒नीर् यो अ॒॒द्धयेति॑ । ऋषि॑भि॒-स्संभृ॑त॒ꣳ॒ रसं᳚ । तस्मै॒ सर॑स्वती दुहे । क्षी॒रꣳ स॒र्पि र्मधू॑द॒कं । पा॒व॒मा॒नी-स्स्व॒स्त्यय॑नीः ॥ 4

सु॒दुघा॒हि पय॑स्वतीः । ऋषि॑भि॒-स्संभृ॑तो॒ रसः॑ ।

ब्रा॒ह्म॒णेष्व॒-मृतꣳ॑ हि॒तं । पा॒व॒मा॒नीर् दि॑शन्तु नः । इ॒मंं ँलो॒कमथो॑ अ॒मुं । कामा॒न्थ्-सम॑द्‌र्ध्यन्तु नः । दे॒वीर्दे॒वैः स॒मा भृ॑ताः । पा॒व॒मा॒नी-स्स्व॒स्त्यय॑नीः । सु॒दुघा॒हि घृ॑त॒श्चुतः॑ । ऋषि॑भि॒-स्संभृ॑तो॒ रसः॑ ॥ 5

ब्रा॒ह्म॒णेष्व॒-मृतꣳ॑ हि॒तं । येन॑ दे॒वाः प॒वित्रे॑ण । आ॒त्मानं॑ पु॒नते॒ सदा᳚ । तेन॑ स॒हस्र॑ धारेण । पा॒व॒मा॒न्यः पु॑नन्तु मा । प्रा॒जा॒प॒त्यं प॒वित्रं᳚ । श॒तोद्या॑मꣳ हिर॒ण्मयं᳚ ।

तेन॑ ब्रह्म॒ विदो॑ व॒यं । पू॒तं ब्रह्म॑ पुनीमहे । इन्द्र॑-स्सुनी॒ती स॒ह मा॑ पुनातु ।

सोम॑-स्स्व॒स्त्या वरु॑ण-स्स॒मीच्या᳚ ।

य॒मो राजा᳚ प्रमृ॒णाभिः॑ पुनातुमा ।

जा॒तवे॑दा मो॒र्जय॑न्त्या पुनातु । (ॐ) भूर्भुव॒स्सुवः॑ ॥ 6

TB 3.5.11.1

तच्छं॒ ँयोरा वृ॑णीमहे । गा॒तुं य~ं॒ज्ञाय॑ । गा॒तुं ँय॒ज्ञप॑तये । दैवी᳚ स्व॒स्ति-र॑स्तुनः । स्व॒स्तिर् -मानु॑षेभ्यः । ऊ॒द्‌र्ध्वं जि॑गातु भेष॒जं ।

शन्नो॑ अस्तु द्वि॒पदे᳚ । शंचतु॑ष्पदे ॥

ॐ शान्तिः॒ शान्तिः॒ शान्तिः॑ ॥

वास्तो᳚ष्पते॒ प्रति॑जानी ह्य॒स्मान्थ् स्वा॑वे॒शो अ॑नमी॒वो भ॑वानः । यत्त्वे म॑हे॒प्रति॒ तन्नो॑ जुषस्व॒ शन्न॑ एधि द्वि॒पदे॒ शंचतु॑ष्पदे । वास्तो᳚ष्पते श॒ग्मया॑ स॒ꣳ॒सदा॑ ते सक्षी॒म हि॑र॒ण्वया॑ गातु॒मत्या᳚ ।

आ वः॒ क्षेम॑ उ॒तयोगे॒ वर॑न्नो यू॒यं पा॑त स्व॒स्तिभि॒-स्सदा॑ नः । APMB (EAK) 2.5.19

वास्तो᳚ष्पते प्र॒तर॑णो न एधि॒ गोभि॒रश्वे॑-भिरिन्दो ।

अ॒जरा॑ सस्तेस॒ख्ये स्या॑म पि॒तेव॑ पु॒त्रान् प्रति॑नो जुषस्व । अ॒मी॒व॒हा वास्तो᳚ष्पते॒ विश्वा॑ रू॒पाण्या॑ वि॒शन्न् । सखा॑ सु॒शेव॑ एधिनः ।

शि॒व॒ꣳ॒ शि॒वं । भूर्भुव॒स्सुवो॒ भूर्भुव॒स्सुवो॒ भूर्भुव॒स्सुवः॑ ॥

उदु॑त्त॒मं ँव॑रुण॒ पाश॑म॒स्म-दवा॑ध॒मं ँविम॑द्ध्य॒मᳺ श्र॑थाय ।

अथा॑व॒यमा॑दित्य व्र॒ते तवाना॑गसो॒ अदि॑तये स्याम ॥ 1

(TS 1.2.8.1 )

अस्त॑भ्‌ना॒द्द्या-मृ॑ष॒भो अ॒न्तरि॑क्ष॒-ममि॑मीत-वरि॒माणं॑ पृथि॒व्या आऽसी॑द॒द्विश्वा॒ भुव॑नानि स॒म्राड् विश्वेत्तानि॒ वरु॑णस्य व्र॒तानि॑ ॥ 2

(TS 3.4.11.6)

यत्किञ्चे॒दं ँ व॑रुण॒ दैव्ये॒ जने॑ऽभिद्रो॒हं म॑नु॒ष्या᳚-श्चरा॑मसि ।

अचि॑त्ती॒-यत्तव॒-धर्मा॑ युयोपि॒म-मान॒स्तस्मा॒ देन॑सो देव रीरिषः ॥ 3

(TS 3.4.11.6)

कि॒त॒वासो॒ यद्रि॑रि॒पुर्न दी॒वि यद्वा॑ घा स॒त्य-मु॒तयन्न वि॒द्म ।

सर्वा॒ताविष्य॑ शिथि॒रेव॑ दे॒वाथा॑ते-स्याम वरुण प्रि॒यासः॑ ॥ 4

(TS 1.5.11.3)

अव॑ते॒हेडो॑ वरुण॒ नमो॑भि॒रव॑ य॒ज्ञे-भि॑रीमहे ह॒विर्भिः॑ ।

क्षय॑न्न॒ स्मभ्य॑ मसुर-प्रचेतो॒ राज॒न्नेनाꣳ॑सि शिश्रथः कृ॒तानि॑ ॥ 5

(T.S. 2.1.11.6)

तत्वा॑यामि॒ ब्रह्म॑णा॒ वन्द॑मान॒ स्तदाशा᳚स्ते॒ यज॑मानो ह॒विर्भिः॑ ।

अहे॑डमानो वरुणे॒ह बो॒द्ध्युरु॑शꣳ स॒ मा न॒ आयुः॒ प्रमो॑षीः ॥ 6

वरुण गायत्री

जुंभकाय॑ वि॒द्महे॑ पाशह॒स्ताय॑ धीमहि । तन्नो॑ वरुणः प्रचो॒दया᳚त् ॥

ॐ शान्तिः॒ शान्तिः॒ शान्तिः॑ ॥

ब्रह्म॑जज्ञा॒॒नं प्र॑थ॒॒मं पु॒॒रस्ता॒द् विसी॑म॒॒त-स्सु॒॒रुचो॑ वे॒॒न आ॑वः ।

स बु॒द्ध्निया॑ उप॒॒मा अ॑स्य वि॒॒ष्ठाः स॒तश्च॒ योनि॒-मस॑तश्च॒ विवः॑ । 1

पि॒ता-वि॒राजा॑ मृष॒भो-र॑यी॒णा-म॒न्तरि॑क्षं ँवि॒श्वरू॑प॒ आवि॑वेश ।

तम॒र्कै-र॒भ्य॑र्चन्ति व॒थ्सं ब्रह्म॒ सन्तं॒ ब्रह्म॑णा व॒र्द्धय॑न्तः । 2

ब्रह्म॑ दे॒वान॑ जनय॒द् ब्रह्म॒ विश्व॑मि॒दं जग॑त् ।

ब्रह्म॑णः क्ष॒त्रं निर्मि॑तं॒ ब्रह्म॑ ब्राह्म॒ण आ॒त्मना᳚ । 3

अ॒न्तर॑स्मि-न्नि॒मे लो॒का अ॒न्तर्विश्व॑मि॒दं जग॑त् ।

ब्रह्मै॒व भू॒तानां॒ ज्येष्ठं॒ तेन॒ को॑ऽर्.हति॒ स्पर्द्धि॑तुं । 4

ब्रह्म॑न् दे॒वा स्त्रय॑स्त्रिꣳश॒द् ब्रह्म॑-न्निन्द्र प्रजाप॒ती ।

ब्रह्म॑न्. ह॒ विश्वा॑ भू॒तानि॑ ना॒वीवा॒न्त-स्स॒माहि॑ता । 5

चत॑स्र॒ आशाः॒ प्रच॑रन्त्व॒ग्नय॑ इ॒मन्नो॑ य॒ज्ञन्न॑यतु प्रजा॒नन्न् ।

घृ॒तं पिन्व॑न्न॒-जरꣳ॑ सु॒वीरं॒ ब्रह्म॑ स॒मिद् भ॑व॒त्या-हु॑तीनां । 6

(ॐ शान्तिः॒ शान्तिः॒ शान्तिः॑ ॥)

(TS 1.2.13.3)

विष्णो॒र्नुकं॑ ँवी॒र्या॑णि॒ प्रवो॑चं॒ ँयः पार्त्थि॑वानि विम॒मे राजꣳ॑सि॒

यो अस्क॑भाय॒-दुत्त॑रꣳ स॒धस्थं॑ विचक्रमा॒ण-स्त्रे॒धोरु॑-गा॒यः ॥ 1

Optional (TS 1.2.13.3)

विष्णो॑-र॒राट॑मसि॒ विष्णोः᳚ पृ॒ष्ठम॑सि॒ विष्णो॒-श्नप्त्रे᳚स्थो॒ विष्णो॒-

स्स्यूर॑सि॒ विष्णो᳚ र्धृ॒वम॑सि वैष्ण॒वम॑सि॒ विष्ण॑वे त्वा ॥ 2

(TB 2.4.6.2)

तद॑स्य प्रि॒य-म॒भिपाथो॑ अश्यां । नरो॒यत्र॑ देव॒यवो॒ मद॑न्ति ।

उ॒रु॒क्र॒मस्य॒ सहि बन्धु॑रि॒त्था । विष्णोः᳚ प॒दे प॑र॒मे मद्ध्व॒ उथ्सः॑ ॥ 3

(TB 2.4.3.4)

प्रतद्विष्णु॑-स्स्तवते वी॒र्या॑य । मृ॒गोन भी॒मः कु॑च॒रो गि॑रि॒ष्ठाः ।

यस्यो॒रुषु॑ त्रि॒षु वि॒क्रम॑णेषु । अधि॑क्षि॒यन्ति॒ भुव॑नानि॒ विश्वा᳚ ॥ 4

(TB 2.8.3.2)

प॒रो मात्र॑या त॒नुवा॑ वृधान । नते॑ महि॒त्वमन्-व॑श्नुवन्ति ।

उ॒भेते॑ विद्म॒ रज॑सी पृथि॒व्या विष्णो॑-देव॒त्वं । प॒र॒मस्य॑ विथ्से ॥ 5

(TB 2.4.3.5)

विच॑क्रमे पृथि॒वी मे॒ष ए॒तां ।

क्षेत्रा॑य॒ विष्णु॒र् -मनु॑षे दश॒स्यन्न् ।

धृ॒वासो॑ अस्य की॒रयो॒ जना॑सः ।

उ॒रु॒क्षि॒तिꣳ सु॒जनि॑माचकार ॥ 6

त्रिर्दे॒वः पृ॑थि॒वी मे॒ष ए॒तां ।

विच॑क्रमे श॒तर्च॑सं महि॒त्वा ।

प्रविष्णु॑रस्तु त॒वस॒स्तवी॑यान् । त्वे॒षᳺ ह्य॑स्य॒ स्थवि॑रस्य॒ नाम॑ ॥ 7

(ॐ शान्तिः॒ शान्तिः॒ शान्तिः॑ ॥)

विष्णो॒र्नुकं॑ ँवी॒र्या॑णि॒ प्रवो॑चं॒ ँयः पार्त्थि॑वानि विम॒मे राजꣳ॑सि॒

यो अस्क॑भाय॒-दुत्त॑रꣳ स॒धस्थं॑ विचक्रमा॒ण-स्त्रे॒धोरु॑-गा॒यः ॥ 1

Optional

विष्णो॑-र॒राट॑मसि॒ विष्णोः᳚ पृ॒ष्ठम॑सि॒ विष्णो॒-श्नप्त्रे᳚स्थो॒ विष्णो॒-स्स्यूर॑सि॒ विष्णो᳚ र्धृ॒वम॑सि वैष्ण॒वम॑सि॒ विष्ण॑वे त्वा ॥ 2

तद॑स्य प्रि॒यम॒भि पाथो॑ अश्यां॒ नरो॒ यत्र॑ देव॒ यवो॒ मद॑न्ति ।

उ॒रु॒क्र॒मस्य॒ स हि बन्धु॑रि॒त्था विष्णोः᳚ प॒दे प॑र॒मे मद्ध्व॒ उथ्सः॑ । 3

प्रतद् विष्णुः॑ स्तवते वी॒र्या॑य मृ॒गो न भी॒मः कु॑च॒रो गि॑रि॒ष्ठाः ।

यस्यो॒रुषु॑ त्रि॒षु वि॒क्रम॑णे॒-ष्वधि॑ क्षि॒यन्ति॒ भुव॑नानि॒ विश्वा᳚ । 4

प॒रो मात्र॑या त॒नुवा॑ वृधान॒ न ते॑ महि॒त्वमन्व॑श्नुवन्ति ।

उ॒भे ते॑ विद्म॒ रज॑सी पृथि॒व्या विष्णो॑ देव॒ त्वं प॑र॒मस्य॑ विथ्से । 5

विच॑क्रमे पृथि॒वीमे॒ष ए॒तां क्षेत्रा॑य॒ विष्णु॒र् मनु॑षे दश॒स्यन्न् ।

धृ॒वासो॑ अस्य की॒रयो॒ जना॑स उरुक्षि॒तिꣳ सु॒जनि॑मा चकार । 6

त्रिर् दे॒वः पृ॑थि॒वीमे॒ष ए॒तां ँविच॑क्रमे श॒तर्च॑ संमहि॒त्वा ।

प्रविष्णु॑रस्तु त॒वस॒ स्तवी॑यान् त्वे॒षᳺ ह्य॑स्य॒ स्थवि॑रस्य॒ नाम॑ । 7

ॐ शान्तिः॒ शान्तिः॒ शान्तिः॑ ॥

(TS 4.5.10.4 )

परि॑णो रु॒द्रस्य॑ हे॒तिर् वृ॑णक्तु॒ परि॑त्वे॒षस्य॑ दुर्म॒तिर॑घा॒योः ।

अव॑स्थि॒रा म॒घव॑द्भ्य-स्तनुष्व॒ मीढ्व॑-स्तो॒काय॒ तन॑याय मृडय ॥ 1

(TS.4.5.10.3)

स्तु॒हि शृ॒तं ग॑र्त्त॒सदं॒ ँयुवा॑नं मृ॒गन्नभी॒म-मु॑पह॒त्नु-मु॒ग्रं ।

मृ॒डाज॑रि॒त्रे रु॑द्र॒स्तवा॑नो अ॒न्यन्ते॑ अ॒स्म-न्निव॑पन्तु॒ सेनाः᳚ ॥ 2

(TS 4.5.10.4)

मीढु॑ष्टम॒ शिव॑तम शि॒वोनः सु॒मना॑ भव ।

प॒र॒मे वृ॒क्ष आयु॑ध न्नि॒धाय॒ कृत्तिं॒ ँवसा॑न॒ आच॑र॒ पिना॑कं॒ बिभ्र॒दाग॑हि ॥ 3

(TA 7.5.7)

अर्.ह॑न् बिभर्षि॒ साय॑कानि॒ धन्व॑ । अर्.ह॑न्नि॒ष्कं ँय॑ज॒तं ँवि॒श्वरू॑पं ।

अर्.ह॑न्नि॒दं द॑यसे॒ विश्व॒ मब्भु॑वं । नवा ओजी॑यो रुद्र॒त्वद॑स्ति ॥ 4

(अर्.ह॑न् बिभर्षि॒ साय॑कानि॒ धन्वार्.ह॑न्नि॒ष्कं ँय॑ज॒तंं ँवि॒श्वरू॑पं ।

अर्.ह॑न्नि॒दं द॑यसे॒ विश्व॒मब्भु॑वं॒ नवा ओजी॑यो रुद्र॒त्वद॑स्ति ॥ )

(TS 1.3.14.1)

त्वम॑ग्ने रु॒द्रो असु॑रो म॒हो दि॒वस्त्वꣳ शर्द्धो॒ मारु॑तं पृ॒क्ष ई॑शिषे ।

त्वं ँवातै॑ररु॒णैर् -या॑सि शंग॒यस्त्वं पू॒षा वि॑ध॒तः पा॑सि॒ नुत्मना᳚ ॥ 5

(TS 1.3.14.1)

आवो॒ राजा॑न-मद्ध्व॒रस्य॑ रु॒द्रꣳ होता॑रꣳ सत्य॒ यज॒ꣳ॒ रोद॑स्योः ।

अ॒ग्निं पु॒रात॑न-यि॒त्नो-र॒चित्ता॒-द्धिर॑ण्य-रूप॒मव॑से कृणुद्ध्वं ॥ 6

(ॐ शान्तिः॒ शान्तिः॒ शान्तिः॑ ॥)

जा॒तवे॑दसे सुनवाम॒ सोम॑-मरातीय॒तो निद॑हाति॒ वेदः॑ ।

सनः॑ पर्.ष॒दति॑ दु॒र्गाणि॒ विश्वा॑ ना॒वेव॒ सिन्धुं॑ दुरि॒तात्य॒ग्निः ॥ 1

ताम॒ग्निव॑र्णां॒ तप॑सा ज्वल॒न्तीं ँवै॑रोच॒नीं क॑र्मफ॒लेषु॒ जुष्टां᳚ ।

दु॒र्गां दे॒वीꣳ शर॑णम॒हं प्रप॑द्ये सु॒तर॑सि तरसे॒ नमः॑ ॥ 2

अग्ने॒ त्वं पा॑रया॒ नव्यो॑ अ॒स्मान्थ् स्व॒स्तिभि॒रति॑ दु॒र्गाणि॒ विश्वा᳚ ।

पूश्च॑ पृ॒थ्वी ब॑हु॒लान॑ उ॒र्वी भवा॑ तो॒काय॒ तन॑याय॒ शं ँयोः ॥ 3

विश्वा॑नि नो दु॒र्गहा॑ जातवेदः॒ सिन्धु॒न्न ना॒वा दु॑रि॒ताति॑ पर्.षि ।

अग्ने॑ अत्रि॒वन् मन॑सा गृणा॒नो᳚ऽस्माकं॑ बोद्ध्यवि॒ता त॒नूनां᳚ ॥ 4

पृ॒त॒ना॒जित॒ꣳ॒ सह॑मान-मु॒ग्रम॒ग्निꣳ हु॑वेम पर॒माथ् स॒धस्था᳚त् ।

सनः॑ पर्.ष॒दति॑ दु॒र्गाणि॒ विश्वा॒ क्षाम॑द्दे॒वो अति॑ दुरि॒तात्य॒ग्निः ॥ 5

(it is customary to chant Only upto Para 5 for Shanti Japam )

प्र॒त्नोषि॑क॒मीड्यो॑ अद्ध्व॒रेषु॑ स॒नाच्च॒ होता॒ नव्य॑श्च॒ सथ्सि॑ ।

स्वाञ्चा᳚ग्ने त॒नुवं॑ पि॒प्रय॑-स्वा॒स्मभ्य॑ञ्च॒ सौभ॑ग॒माय॑ जस्व ॥ 6

गोभि॒र्जुष्ट॑-म॒युजो॒ निषि॑क्तं॒ तवे᳚न्द्र विष्णो॒-रनु॒सञ्च॑रेम ।

नाक॑स्य पृ॒ष्ठम॒भि सं॒ ँवसा॑नो॒ वैष्ण॑वीं ँलो॒क इ॒ह मा॑दयन्तां ॥ 7

का॒त्या॒य॒नाय॑ वि॒द्महे॑ कन्यकु॒मारि॑ धीमहि । तन्नो॑ दुर्गिः प्रचो॒दया᳚त् ॥

(ॐ शान्तिः॒ शान्तिः॒ शान्तिः॑ ॥)

(To be Chanted as per Rig Vedic Sruti; hence “Anunaasikam”,

“(gm)” and “(gg)” are not represented here as they are not used in Rig Vedic chants. In Some parts of India, when this Suktham is chanted in Krishna Yajur Veda “(gm)” , “(gg)” are added in para 9 and 12, whereas in other parts of India this full Suktham is chanted without “(gm)” , “(gg)”. )

हिर॑ण्यवर्णां॒ हरि॑णीं सुव॒र्ण र॑जत॒स्रजां ।

च॒न्द्रां॒ हि॒रण्म॑यीं ल॒क्ष्मीं॒ जा॒तवे॑दो म॒ आव॑ह ॥ 1

तां म॒ आव॑ह॒ जात॑वेदो ल॒क्ष्मी-मन॑पगा॒मिनीं᳚ ।

यस्यां॒ हिर॑ण्यं वि॒न्देयं॒-गामश्वं॒ पुरु॑षान॒हं ॥ 2

अ॒श्व॒पू॒र्वां र॑थम॒द्ध्यां॒ ह॒स्तिना॑द-प्र॒बोधि॑नीं ।

श्रियं॑ दे॒वीमुप॑ह्वये॒ श्रीर्मा॑दे॒वीर्जु॑षतां ॥ 3

कां॒ सो॒ऽस्मि॒तां हिर॑ण्य-प्राकारा-मा॒र्द्रां ज्वलं॑तीं तृ॒प्तां त॒र्पय॑न्तीं ।

प॒द्मे॒स्थि॒तां प॒द्मव॑र्णां॒ तामि॒होप॑ह्वये श्रियं ॥ 4

च॒न्द्रां प्र॑भा॒सां यश॑सा॒-ज्वलं॑तीं॒ श्रिय॑लों॒के दे॒वजु॑ष्टा-मुदा॒रां ।

तां प॒द्मिनी॑मीं॒ शर॑णम॒हं प्रप॑द्ये ऽल॒क्ष्मीर्मे॑ नश्यतां॒ त्वां वृ॑णे ॥ 5

आ॒दि॒त्यव॑र्णे॒ तप॒सोऽधि॑जा॒तो वन॒स्पति॒स्तव॑ वृ॒क्षोऽथ॑ बि॒ल्वः॑ ।

तस्य॒फला॑नि॒ तप॒सा-नु॑दन्तु मा॒यान्त॑-रा॒याश्च॑ बा॒ह्या॑ अल॒क्ष्मीः ॥ 6

उपै॑तु॒ मां दे॑वस॒खः की॒र्त्तिश्च॒ मणि॑ना स॒ह ।

प्रा॒दु॒र्भू॒तोऽस्मि॑ रा॒ष्ट्रे॒ऽस्मिन् की॒र्त्ति-मृद्धिं॑-ददा॒तु मे ॥ 7

क्षुत्पि॑पा॒सा-म॑लां ज्ये॒ष्ठा॒म-ल॒क्ष्मीं-ना॑शया॒म्यहं ।

अभू॑ति॒-मस॑मृद्धिं॒च॒ स॒र्वां॒ निर्णु॑द मे॒ गृहात् ॥ 8

ग॒न्ध॒द्वा॒रां दु॑राध॒र्.षां॒ नि॒त्यपु॑ष्टां करी॒षिणीं᳚ ।

ई॒श्वरीं᳚ (Or ई॒श्वरीꣳ॑) सर्व॑ भूता॒नां॒ तामि॒होप॑ह्वये॒ श्रियं॑ ॥ 9

मन॑सः॒ काम॒माकू॑तिं-वा॒चः स॒त्य म॑शीमहि ।

प॒शू॒नां रू॒पमन्न॑स्य॒ मयि॒ श्रीः श्र॑यतां॒ यशः॑ ॥ 10

क॒र्दमे॑न प्र॑जा भू॒ता॒ म॒यि॒ संभ॑व क॒र्द॑म ।

श्रियं॑ वा॒सय॑मे कु॒ले॒ मा॒तरं॑ पद्म॒मालि॑नीं ॥ 11

आपः॑ सृजन्तु॒ स्निग्धा॑नि॒ चिक्ली॑त॒ वस॑मे॒ गृहे ।

निच॑दे॒वीं मा॒तरं॒ (Or मा॒तर॒ᳺ॒) श्रियं॑ वा॒सय॑मे कु॒ले ॥ 12

आ॒र्द्रां यः॒ करि॑णीं य॒ष्टिं॒ पि॒ङ्ग॒लां प॑द्म॒मालिनीं ।

च॒न्द्रां॒ हि॒रण्म॑यीं ल॒क्ष्मीं॒ जात॑वेदो म॒ आव॑ह ॥ 13

आ॒र्द्रां पु॒ष्करि॑णीं पु॒ष्टिं॒ सु॒व॒र्णां हे॑ममा॒लिनीं ।

सू॒र्यां॒ हिरण्म॑यीं ल॒क्ष्मीं॒-जात॑वेदो म॒ आव॑ह ॥ 14

तां म॒ आव॑ह॒ जात॑वेदो ल॒क्ष्मी-मन॑पगा॒मिनीं᳚ ।

यस्यां॒ हिर॑ण्यं॒ प्रभू॑तं॒ गावो॑ दा॒स्योऽश्वा᳚न् वि॒न्देयं॒ पुरु॑षान॒हं ॥ 15

पद्म॑प्रिये पद्मि॑नि पद्म॑हस्त॒ पद्मा॑लये पद्म॒दला॑य-ताक्षि ।

विश्व॑प्रिये विष्णु-मनो॑नुकू॒ले त्वत्पा॑द-पद्मं मयि॒ सन्नि॑धत्स्व ॥

म॒हा॒दे॒व्यै च॑ वि॒द्महे॑ विष्णु प॒त्न्यै च॑ धीमहि ।

तन्नो॑ लक्ष्मीः प्रचो॒दया᳚त् ॥

श्री र्वर्च॑स्व॒-मायु॑ष्य॒-मारो᳚ग्य॒-मावी॑धा॒-च्छोभ॑मानं मही॒यते᳚ ।

धा॒न्यं ध॒नं प॒शुं ब॒हुपु॑त्रला॒भं श॒तसं᳚वथ्स॒रं दी॒र्घमायुः॑ ॥

(ॐ शान्तिः॒ शान्तिः॒ शान्तिः॑ ॥)

मे॒धादे॒वी जु॒षमा॑णा न॒ आगा᳚द् वि॒श्वाची॑ भ॒द्रा सु॑मन॒स्य मा॑ना ।

त्वया॒ जुष्टा॑ नु॒दमा॑ना (जु॒षमा॑णा) दु॒रुक्ता᳚न् बृ॒हद्व॑देम वि॒दथे॑ सु॒वीराः᳚ ॥

त्वया॒ जुष्ट॑ ऋ॒षिर् भ॑वति देवि॒त्वया॒ ब्रह्मा॑ऽऽग॒तश्री॑ रु॒तत्वया᳚ ।

त्वया॒ जुष्ट॑श्चि॒त्रं ँवि॑न्दते वसु॒सानो॑ जुषस्व॒ द्रवि॑णो न मेधे ॥

मे॒धां म॒ इन्द्रो॑ ददातु मे॒धां दे॒वी सर॑स्वती ।

मे॒धां मे॑ अ॒श्विना॑ वु॒भावाध॑त्तां॒ पुष्क॑रस्रजा ॥

अ॒फ्स॒रासु॑ च॒ या मे॒धा ग॑न्ध॒र्वेषु॑ च॒ यन्मनः॑ ।

दैवीं᳚ मे॒धा मनुष्यजा सा मां᳚ मे॒धा सु॒रभि॑र् जुषतां ॥

(दैवीं᳚ मे॒धा सर॑स्वती॒ सा मां᳚ मे॒धा सु॒रभि॑र जुषता॒ᳺ॒ स्वाहा᳚ )

आमां᳚ मे॒धा सु॒रभि॑र्-वि॒श्वरू॑पा॒ हिर॑ण्यवर्णा॒ जग॑ती जग॒म्या ।

ऊर्ज॑स्वती॒ पय॑सा॒ पिन्व॑माना॒ सा मां᳚ मे॒धा सु॒प्रती॑का जुषन्तां ॥

मयि॑ मे॒धां मयि॑ प्र॒जां मय्य॒ग्नि-स्तेजो॑दधातु॒ ,

मयि॑ मे॒धां मयि॑ प्र॒जां मयीन्द्र॑ इन्द्रि॒यं द॑धातु॒ ,

मयि॑ मे॒धां मयि॑ प्र॒जां मयि॒ सूर्यो॒ भ्राजो॑ दधातु ॥

हंसगायत्री-

ह॒सं ह॒सांय॑ वि॒द्महे॑ परमह॒सांय॑ धीमहि । तन्नो॑ हंसः प्रचो॒दया᳚त् ॥

(ॐ शान्तिः॒ शान्तिः॒ शान्तिः॑ ॥)

ॐ ॥ भूमि॑र् भू॒म्ना द्यौर्व॑रि॒णा-ऽन्तरि॑क्षं महि॒त्वा ।

उ॒पस्थे॑ ते देव्यदिते॒-ऽग्निम॑न्ना॒द-म॒न्ना-द्या॒॒याद॑धे ।

आऽयङ्गौः पृश्नि॑रक्रमी॒-दस॑नन् मा॒तरं॒ पुनः॑ । पि॒तर॑ञ्च प्र॒यन्थ्सुवः॑ ।

त्रि॒ꣳ॒शद्धाम॒ विरा॑जति॒ वाक्प॑त॒ङ्गाय॑ शिश्रिये । प्रत्य॑स्य वह॒द्युभिः॑ ।

अ॒स्य प्रा॒णाद॑पा-न॒त्य॑न्तश्च॑रति रोच॒ना । व्य॑ख्यन् महि॒ष स्सुवः॑ ॥ 1

यत्वा᳚ कृ॒द्धः प॑रो॒ वप॑-म॒न्युना॒ यदव॑र्त्त्या ।

सु॒कल्प॑मग्ने॒ तत्तव॒ पुन॒स्त्वो-द्दी॑पयामसि ।

यत्ते॑ म॒न्यु प॑रोप्तस्य पृथि॒वी-मनु॑दद्ध्व॒से ।

आ॒दि॒त्या विश्वे॒ तद्दे॒वा वस॑वश्च स॒माभ॑रन्न् ।

मनो॒ ज्योति॑र् जुषता॒-माज्यं॒ विच्छि॑न्नं ँय॒॒ज्ञꣳ समि॒॒मन्द॑धातु ।

बृह॒स्पति॑-स्तनुता मि॒मन्नो॒ विश्वे॑ दे॒वा इ॒ह मा॑दयन्तां ॥ 2

स॒प्तते॑ अग्ने स॒मिधः॑ स॒प्त जि॒ह्वाः-स॒प्तर्.ष॑यः-स॒प्तधाम॑ प्रि॒याणि॑ ।

स॒प्त होत्रा᳚ स्सप्त॒ धात्वा॑ यजन्ति स॒प्तयोनी॒-रापृ॑णस्वा घृ॒तेन॑ ।

पुन॑रू॒र्जा निव॑र्त्तस्व॒ पुन॑रग्न इ॒हायु॑षा । पुन॑र्नः पाहि वि॒श्वतः॑ ।

स॒हर॒य्या निव॑र्त्त॒स्वाग्ने॒ पिन्व॑स्व॒ धार॑या ।

वि॒श्वफ्‌स्नि॑या वि॒श्वत॒स्परि॑ ॥ 3

लेक॒-स्सले॑क-स्सु॒लेक॒ स्तेन॑ आदि॒त्या आज्यं॑ जुषा॒णा वि॑यन्तु॒ , केत॒-स्सके॑त-स्सु॒केत॒ स्तेन॑ आदि॒त्या आज्यं॑ जुषा॒णा वि॑यन्तु॒,

विव॑स्वा॒ꣳ॒ अधि॑ति॒र् देव॑ जूति॒स्तेन॑ आदि॒त्या आज्यं॑

जुषा॒णा वि॑यन्तु ॥ 4

ॐ शान्तिः॒ शान्तिः॒ शान्तिः॑ ॥

प्रा॒तर॒ग्निं प्रा॒तरिन्द्रꣳ॑ हवामहे प्रा॒तर्मि॒त्रा वरु॑णा प्रा॒तर॒श्विना᳚ ।

प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तस्सोम॑मु॒त रु॒द्रꣳ हु॑वेम ॥ 1

प्रा॒त॒र्जितं॒ भग॑मु॒ग्रꣳ हु॑वेम व॒यं पु॒त्रमदि॑ते॒र्यो वि॑ध॒र्ता ।

आ॒द्ध्रश्चि॒द्यं मन्य॑मान-स्तु॒रश्चि॒द्राजा॑ चि॒द्यं भगं॑ भ॒क्षीत्याह॑ ॥ 2

भग॒प्रणे॑त॒र्भग॒-सत्य॑राधो॒ भगे॒मां धिय॒मुद॑व॒ दद॑न्नः ।

भग॒प्रणो॑ जनय॒ गोभि॒-रश्वै॒र् भग॒प्रनृभि॑र् नृ॒वन्त॑-स्स्याम ॥ 3

उ॒तेदानीं॒ भग॑वन्त-स्स्यामो॒त प्रपि॒त्व उ॒त मद्ध्ये॒ अह्नां᳚ ।

उ॒तोदि॑ता मघव॒न्थ्-सूर्य॑स्य व॒यं दे॒वानाꣳ॑ सुम॒तौ स्या॑म ॥ 4

भग॑ ए॒व भग॑वाꣳ अस्तु देवा॒स्तेन॑ व॒यं भग॑वन्त-स्स्याम ।

तं त्वा॑ भग॒ सर्व॒ इज्जो॑हवीमि॒ सनो॑ भग पुर ए॒ता भ॑वे॒ह ॥ 5

सम॑द्ध्व॒रा-यो॒षसो॑ ऽनमन्त दधि॒क्रावे॑व॒ शुच॑ये प॒दाय॑ ।

अ॒र्वा॒ची॒नं ँव॑सु॒विदं॒ भग॑न्नो॒ रथ॑मि॒वाश्वा॑ वा॒जिन॒ आव॑हन्तु ॥ 6

अश्वा॑वती॒र् गोम॑तीर्न उ॒षासो॑ वी॒रव॑ती॒-स्सद॑मुच्छन्तु भ॒द्राः ।

घृ॒तं दुहा॑ना वि॒श्वतः॒ प्रपी॑ना यू॒यं पा॑त स्व॒स्ति-भि॒स्सदा॑नः ॥ 7

यो मा᳚ऽग्ने भा॒गिनꣳ॑ स॒न्तमथा॑ भा॒गं चिकी॑र्.षति ।

अभा॒ग-म॑ग्ने॒ तं कु॑रु॒ माम॑ग्ने भा॒गिनं॑ कुरु ॥ 8

भाग्यदेवतायै॒ नमः ॥ (ॐ शान्तिः॒ शान्तिः॒ शान्तिः॑) ॥

(TA 3.15.1, Para 1 & 2)

हरि॒ꣳ॒ हर॑न्त॒ मनु॑यन्ति दे॒वाः । विश्व॒स्येशा॑नं ँवृष॒भं म॑ती॒नां ।

ब्रह्म॒ सरू॑प॒ मनु॑ मे॒दमागा᳚त् । अय॑नं॒ मा विव॑धी॒र् विक्र॑मस्व ।

मा छि॑दो मृत्यो॒ माव॑धीः । मामे॒ बलं॒ ँविवृ॑हो॒ मा प्रमो॑षीः ।

प्र॒जां मा मे॑ रीरिष॒ आयु॑रुग्र । नृ॒चक्ष॑सं त्वा ह॒विषा॑ विधेम ।

स॒द्यश्च॑-कमा॒नाय॑ । प्र॒वे॒पा॒नाय॑ मृ॒त्यवे᳚ । प्रास्मा॒ आशा॑ अशृण्वन्न् ।

कामे॑ना जनय॒न् पुनः॑ । कामे॑नमे॒ काम॒ आगा᳚त् ।

हृद॑या॒द्धृद॑यं मृ॒त्योः । यद॒मीषा॑ म॒दः प्रि॒यं । तदैतूप॒मा-म॒भि ॥ 1

परं॑ मृत्यो॒ अनु॒परे॑हि॒ पन्थां᳚ । यस्ते॒स्व इत॑रो देव॒याना᳚त् ।

चक्षु॑ष्मते श्रृण्व॒ते ते᳚ ब्रवीमि । मानः॑ प्र॒जाꣳ री॑रिषो॒ मोतवी॒रान् ।

प्रपू॒र्व्यं मन॑सा॒ वन्द॑मानः । नाध॑मानो वृष॒भं-च॑र्.षणी॒नां ।

यः प्र॒जाना॑ मेक॒राण्मानु॑षीणां । मृ॒त्युं ँय॑जे प्रथम॒जा मृ॒तस्य॑ ॥ 2

TB 3.9.15.1 (para 3 to 5)

सर्वे॑षु॒ वा ए॒षु लो॒केषु॑ मृ॒त्यवो॒ऽन्वाय॑त्ताः ।

तेभ्यो॒ यदाहु॑ती॒र्न जु॑हु॒यात् । लो॒के लो॑क एनं मृ॒त्युर् वि॑न्देत् ।

मृ॒त्यवे॒ स्वाहा॑ मृ॒त्यवे॒ स्वाहेत्य॑भि पू॒र्व माहु॑ती र्जुहोति ।

लो॒का ल्लो॑का दे॒व मृ॒त्युमव॑ यजते ।

नैनं॑ ँलो॒के लो॑के मृ॒त्यु र्वि॑न्दति ।

यद॒मुष्मै॒ स्वाहा॒ऽमुष्मै॒ स्वाहेति॒ जुह्व॑थ्सं॒ चक्षी॑त ॥ 3

ब॒हुं मृ॒त्यु-म॒मित्रं॑ कुर्वीत । मृ॒त्यवे॒ स्वाहेत्ये क॑स्मा ए॒वैका᳚ञ्जुहुयात् ।

एको॒ वा अ॒मुष्मि॑न् ँलो॒के मृ॒त्युः । अ॒श॒न॒या॒ मृ॒त्युरे॒व ।

तमे॒वा मुष्मि॑न् ँलो॒के ऽव॑यजते ।

भ्रू॒ण॒ह॒त्यायै॒ स्वाहेत्य॑ वभृ॒थ आहु॑तिं जुहोति ।

भ्रू॒ण॒ह॒त्यामे॒वा व॑यजते । तदा॑हुः । यद्भ्रू॑ण ह॒त्या-ऽपा॒त्र्याऽथ॑ ।

कस्मा᳚द् य॒ज्ञे ऽपि॑क्रियत॒ इति॑ ।

अमृ॑त्यु॒र्वा अ॒न्यो भ्रू॑णह॒त्याया॒ इत्या॑हुः ।

भ्रू॒ण॒ह॒त्या वाव मृ॒त्युरिति॑ ।

यद् भ्रू॑ण ह॒त्यायै॒ स्वाहेत्य॑ वभृ॒थ आहु॑तिं जु॒होति॑ । मृ॒त्युमे॒वा हु॑त्या-तर्पयि॒त्वा प॑रि॒पाणं॑ कृ॒त्वा । भ्रू॒ण॒घ्ने भे॑ष॒जं क॑रोति ॥ 4

ए॒ताꣳ ह॒वै मु॑ण्डि॒भ औ॑दन्य॒वः ।

भ्रू॒ण॒ह॒त्यायै॒ प्राय॑श्चित्तिं ँवि॒दाञ्च॑कार ।

योहा॒स्यापि॑ प्र॒जायां᳚ ब्राह्म॒णꣳ हन्ति॑ । सर्व॑स्मै॒ तस्मै॑ भेष॒जं क॑रोति ।

जु॒बं॒काय॒ स्वाहेत्य॑ वभृ॒थ उ॑त्त॒मा- माहु॑तिं जुहोति । वरु॑णो॒ वै जु॑बं॒कः । अ॒न्त॒त ए॒व वरु॑ण॒-मव॑यजते ।

ख॒ल॒तेर्-वि॑क्लि॒धस्य॑ शु॒क्लस्य॑ पिङ्गा॒क्षस्य॑ मू॒र्द्धं जु॑होति । ए॒तद्वै वरु॑णस्य रू॒पं । रू॒पेणै॒व वरु॑ण॒ मव॑यजते ॥ 5

Part 2 (T.A.6.45.1, for para 1 to 16)

अपै॑तु मृ॒त्युर॒-मृत॑न्न॒ आग॑न्वैवस्व॒तो नो॒ अभ॑यङ्कृणोतु । प॒र्णं ँवन॒स्पते॑-रिवा॒भि न॑श्शीयताꣳ र॒यि-स्सच॑तान्न॒ श्शची॒पतिः॑ ॥ 1

परं॑ मृत्यो॒ अनु॒परे॑हि॒ पन्थां॒ ँयस्ते॒स्व इत॑रो देव॒याना᳚त् । चक्षु॑ष्मते श्रृण्व॒ते ते᳚ ब्रवीमि॒ मानः॑ प्र॒जाꣳ री॑रिषो॒ मोत वी॒रान् ॥ 2

वातं॑ प्रा॒णं मन॑सा॒ ऽन्वार॑भामहे प्र॒जाप॑तिं॒ ँयो भुव॑नस्य गो॒पाः । सनो॑ मृ॒त्यो स्त्रा॑यतां॒ पात्वꣳ ह॑सो॒ ज्योग्जी॒वा ज॒राम॑शीमहि ॥ 3

अ॒मु॒त्र॒भूया॒दध॒ यद्य॒मस्य॒ बृह॑स्पते अ॒भिश॑स्ते॒र मु॑ञ्चः । प्रत्यौ॑हता म॒श्विना॑ मृ॒त्यु-म॑स्माद्-दे॒वाना॑मग्ने भि॒षजा॒ शची॑भिः ॥ 4

शल्कै॑र॒ग्नि मि॑न्धा॒न उ॒भौ लो॒कौ स॑नेम॒हं ।

उ॒भयो᳚र् लो॒कयोर्॑. ऋ॒द्ध्वाऽति॑ मृ॒त्युं त॑राम्य॒हं ॥ 5

हरि॒ꣳ॒ हर॑न्त॒-मनु॑यन्ति दे॒वा विश्व॒स्येशा॑नं ँवृष॒भं म॑ती॒नां । ब्रह्म॒सरू॑प॒ मनु॑मे॒दमागा॒-दय॑नं॒ मा विव॑धी॒र् विक्र॑मस्व ॥ 6

माच्छि॑दो मृत्यो॒ माव॑धी॒र्-मामे॒ बलं॒ ँविवृ॑हो॒ मा प्रमो॑षीः । प्र॒जां मामे॑ रीरिष॒ आयु॑रुग्र नृ॒चक्ष॑सं त्वा ह॒विषा॑ विधेम ॥ 7

मा नो॑ म॒हान्त॑मु॒त मा नो॑ अर्भ॒कं मा न॒ उक्ष॑न्तमु॒त मा न॑ उक्षि॒तं । मा नो॑ऽवधीः पि॒तरं॒ मोत मा॒तरं॑ प्रि॒या मा न॑स्त॒नुवो॑ रुद्र रीरिषः ॥ 8

मा न॑स्तो॒के तन॑ये॒ मा न॒ आयु॑षि॒ मा नो॒ गोषु॒ मा नो॒ अश्वे॑षु रीरिषः । वी॒रान्मा नो॑ रुद्र भामि॒तोव॑धीर्. ह॒विष्म॑न्तो॒ नम॑सा विधेम ते ॥ 9

प्रजा॑पते॒ न त्वदे॒ता-न्य॒न्यो विश्वा॑ जा॒तानि॒ परि॒ ता ब॑भूव । यत्का॑मास्ते जुहु॒मस्तन्नो॑ अस्तु व॒यᳺ स्या॑म॒ पत॑यो रयी॒णां ॥ 10

यत॑ इन्द्र॒ भया॑महे॒ ततो॑ नो॒ अभ॑यं कृधि ।

मघ॑वञ्छ॒ग्द्धि तव॒ तन्न॑ ऊ॒तये॒ विद्विषो॒ विमृधो॑ जहि ॥ 11

स्व॒स्ति॒॒दा वि॒शस्पति॑र् वृत्र॒हा विमृधो॑ व॒शी ।

वृषेन्द्रः॑ पु॒र ए॑तुन स्वस्ति॒दा अ॑भयं क॒रः ॥ 12

त्र्यं॑बकं ँयजामहे सुग॒न्धिं पु॑ष्टि॒वर्द्ध॑नं । उ॒र्वा॒रु॒कमि॑व॒ बन्ध॑नान्-मृ॒त्योर्-मु॑क्षीय॒ माऽमृता᳚त् ॥ 13

अप॑मृ॒त्यु-मप॒क्षुध॒-मपे॒त-श्श॒पथं॑जहि ।

अधा॑नो अग्न॒ आव॑ह रा॒य-स्पोषꣳ॑ सह॒स्रिणं᳚ ॥ 14

ये ते॑ स॒हस्र॑म॒युतं॒ पाशा॒ मृत्यो॒र् मत्या॑य॒ हन्त॑वे । तान्. य॒ज्ञस्य॑ मा॒यया॒ सर्वा॒नव॑ यजामहे ॥ 15

(मृ॒त्यवे॒ स्वाहा॑ मृ॒त्यवे॒ स्वाहा᳚ )

जा॒तवे॑दसे सुनवाम॒ सोम॑मराती य॒तो निद॑हाति॒ वेदः॑ ।

स नः॑ पर्.षदति॑ दु॒र्गाणि॒ विश्वा॑ ना॒वेव॒ सिन्धुं॑ दुरि॒तात्य॒ग्निः ॥ 16

T.B.3.10.5.1 for para 17

भूर्भूव॒स्स्वः॑ । ओजो॒ बलं᳚ । ब्रह्म॑ क्ष॒त्रं । यशो॑ म॒हत् । स॒त्यं तपो॒ नाम॑ । रू॒प-म॒मृतं᳚ । चक्षुः॒ श्रोत्रं᳚ । मन॒ आयुः॑ ॥

विश्वं॒ ँयशो॑ म॒हः । स॒मन्तपो॒ हरो॒ भाः ॥ 17

जा॒तवे॑दा॒ यदि॑ वा पाव॒कोऽसि॑ । वै॒श्वा॒न॒रो यदि॑ वा वैद्यु॒तोऽसि॑ ।

शंप्र॒जाभ्यो॒ यज॑मानाय लो॒कं ॥ ऊर्जं॒ पुष्टिं॒ दद॑-द॒भ्याव॑ वृथ्स्व ॥ 18

.............नक्षत्रे .......... राशौ जातस्य ..............शर्मणः (मम / अस्य यजमानस्य) सकुटुंबस्य (स्त्री - जातायाः ~ऽ नाम्नी)

मृ॒त्युर्-न्न॑श्य॒त्वायु॑ र्वर्द्धतां॒ भूः ।

मृ॒त्युर्-न्न॑श्य॒त्वायु॑ र्वर्द्धतां॒ भुवः॑ ।

मृ॒त्युर्-न्न॑श्य॒त्वायु॑ र्वर्द्धता॒ꣳ॒ सुवः॑ ।

मृ॒त्युर्-न्न॑श्य॒त्वायु॑ र्वर्द्धतां॒ भूर्भुव॒स्सुवः॑ ।

मृ॒त्युर्-न्न॑श्य॒त्वायु॑र् वर्द्धतां ॥

मृत्यु सूक्तं समाप्तं------------

मु॒ञ्चामि॑त्वा ह॒विषा॒ जीव॑नाय॒ कम॑ज्ञात-य॒क्ष्मा-दु॒त रा᳚ज-य॒क्ष्मात् ।

ग्राहि॑र् ज॒ग्राह॒ यदि॑ वै॒तदे᳚न॒न्तस्या᳚ इन्द्राग्नी॒ प्रमु॑मुक्तमेनं ॥ 1

यदि॑क्षि॒तायु॒र्-यदि॑वा॒परे᳚तो॒ यदि॑मृ॒त्योर᳚न्ति॒ कन्नी᳚त ए॒व ।

तमाह॑रामि॒ निर्.ऋ॑ते रु॒पस्था॒-दस्पा᳚र्.षमेनं श॒तशा᳚रदाय ॥ 2

स॒ह॒स्रा॒क्षेण॑ श॒तशा᳚रदेन श॒तायु॑षा ह॒विषा ऽहा᳚र्षमेनं ।

श॒तं यथे॒मं श॒रदो॒ न या॒तीन्द्रो॒ विश्व॑स्य दुरि॒तस्य॑ पा॒रं ॥ 3

श॒तञ्जी᳚व श॒रदो॒ वर्द्ध॑मान-श्श॒तं हे᳚म॒न्ताञ्छ॒त-मु॑वस॒न्तान् ।

श॒तमि᳚न्द्रा॒ग्नी स॑वि॒ता बृह॒स्पति॑-श्श॒तायु॑षा ह॒विषे॒मं पुन॑र्दुः ॥ 4

आहा᳚र्.षं॒ त्वा वि॑दन्त्वा॒ पुन॒रागाः᳚ पुनर्नव ।

सर्वा᳚ङ्ग॒ सर्व᳚न्ते॒ चक्षुः॒ सर्व॒-मायु॑श्चते ऽवि॒दं ॥ 5

तदित् प॒दं न विचि॑केत-वि॒द्वान् । यन्मृ॒तः पुन॑र॒प्येति॑ जी॒वान् ।

त्रि॒वृद्यद् भुव॑नस्य रथ॒वृत् । जी॒वो गर्भो॒ न मृ॒तस्स जी॑वात् ॥ 6

ॐ शान्तिः॒ शान्तिः॒ शान्तिः॑ ॥

(Exact source not known)

यो ब्र॒ह्मा ब्रह्मण उ॑ज्जहा॒र॒ प्रा॒णैः शि॒रः कृत्तिवासाः᳚ पिना॒की ।

ईशानो देवस्सन आयु॑र्दधा॒तु॒ तस्मै जुहोमि हवि॑षा घृते॒न ॥ 1

वि॒भ्रा॒ज॒मा॒न-स्सरिर॑स्य म॒द्ध्या॒द् रो॒च॒मा॒नो घर्मरुचि॑र्य आ॒गात् ।

स मृत्युपाशा-नपनु॑द्य घो॒रा॒-नि॒हा॒यु॒षे॒णो घृतम॑त्तु दे॒वः ॥ 2

ब्रह्मज्योतिर् ब्रह्मपत्नी॑षु ग॒र्भं॒ ँय॒मा॒द॒धात् पुरुरूपं॑ जय॒न्तं ।

सुवर्णरंभ-ग्रह-म॑र्कम॒र्च्यं॒ त॒मा॒यु॒षे वद्‌र्धयामो॑ घृते॒न ॥ 3

श्रियं ँलक्ष्मी-मौबला-म॑बिंकां॒ गां॒ ष॒ष्टीञ्च या॒मिन्द्र-सेने᳚त्युदा॒हुः ।

तां॒ ँवि॒द्यां ब्रह्मयोनिꣳ॑ सरू॒पा॒-मि॒हा॒यु॒षे तर्पयामो॑ घृते॒न ॥ 4

दाक्षायण्य-स्सर्वयोन्य॑ स्सुयो॒न्य॒-स्स॒ह॒स्र॒शो विश्व रूपा॑ विरू॒पाः ।

ससूनव-स्सपतयः॑ सयू॒थ्या॒ आ॒यु॒षे॒णो घृतमिदं॑ जुष॒न्तां ॥ 5

दिव्या॑ गणा बहुरूपाः᳚ पु॒रा॒णा॒ आ॒यु॒श्छि॒दो॒ नः प्रमथ्न॑न्तु वी॒रान् ।

तेभ्यो जुहोमि बहुधा॑ घृ॒ते॒न॒ मा॒ नः॒ प्र॒जाꣳ रीरिषो मो॑त वी॒रान् ॥ 6

ए॒कः॒ पु॒रस्ताद् य इदं॑ ब॒भू॒व॒ यतो बभूव भुवन॑स्य गो॒पाः ।

यमप्येति भुवनꣳ सां᳚परा॒ये॒ स नो हविर् घृत-मिहायुषे᳚ऽत्तु दे॒वः ॥ 7

व॒सून् रुद्रा॑ना-दि॒त्या॒न् मरुतो॑ऽथ सा॒द्ध्या॒न् ऋभू॑न् य॒क्षा॒न्

गन्धर्वाᳺश्च पितृᳺ॑श्च वि॒श्वान् ।

भृ॒गू॒न्थ्-सर्पाᳺ॑श्चा-ङ्गिगरसो॑ऽथ स॒र्वा॒न् घृ॒त॒ꣳ॒ हु॒त्वा स्वायुष्या महया॑म श॒श्वत् ॥ 8

विष्णो॒ त्वन्नो॒ अन्त॑म॒-श्शर्म॑यच्छ सहन्त्य ।

(ॐ शान्तिः॒ शान्तिः॒ शान्तिः॑ ॥)

प्रत्यधिदेवता - पशुपतिः)

ॐ आस॒त्येन॒ रज॑सा॒ वर्त्त॑मानो निवे॒शय॑न्न॒मृतं॒ मर्त्त्य॑ञ्च ।

हि॒र॒ण्यये॑न सवि॒ता रथे॒ना ऽदे॒वो या॑ति॒ भुव॑ना वि॒पश्यन्न्॑ ॥

(TS 3.4.11.2)

अ॒ग्निं दू॒तं ँवृ॑णीमहे॒ होता॑रं ँवि॒॒श्ववे॑दसं । अ॒स्य य॒ज्ञस्य॑ सु॒क्रतुं᳚ ॥ (T.B.3.5.2.3)

येषा॒मीशे॑ पशु॒पतिः॑ पशू॒नां-चतु॑ष्पदामु॒त च॑ द्वि॒पदां᳚ ।

निष्क्री॑तो॒ऽयं ँय॒॒ज्ञियं॑ भा॒गमे॑तु रा॒यस्पोषा॒ यज॑मानस्य सन्तु ॥ (TS 3.1.4.1)

(ॐ अधिदेवता प्रत्यधिदेवता सहिताय भगवते आदि॑त्याय॒ नमः॑) 1

प्रत्यधिदेवता - क्षेत्रपतिः)

ॐ अ॒ग्निर्मू॒र्द्धा दि॒वः क॒कुत्पतिः॑ पृथि॒व्या अ॒यं ।

अ॒पाꣳ रेताꣳ॑सि जिन्वति ॥ (TS 1.5.5.1)

स्यो॒ना पृ॑थिवि॒ भवा॑ऽनृक्ष॒॒रा नि॒वेश॑नी ।

यच्छा॑न॒-श्शर्म॑ स॒प्रथाः᳚॥ (TA 6.1.10)

क्षेत्र॑स्य॒ पति॑ना व॒यꣳ हि॒तेने॑व जयामसि ।

गामश्वं॑ पोषयि॒त्न्वा स नो॑ मृडाती॒-दृशे᳚ ॥ (TS 1.1.14.2)

(ॐ अधिदेवता प्रत्यधिदेवता सहिताय भगवते अङ्क्रका॑य॒ नमः॑) 2

ॐ प्रव॑श्शु॒क्राय॑ भा॒नवे॑ भरध्वꣳ ह॒व्यं म॒तिं चा॒ग्नये॒ सुपू॑तं ।

यो दैव्या॑नि॒ मानु॑षा ज॒नूᳺ-ष्य॒॒न्तर् विश्वा॑नि वि॒द्मना॒ जिगा॑ति ॥ (TB 2.8.2.3)

इ॒न्द्रा॒णी मा॒सु नारि॑षु सु॒पत्नी॑-म॒हम॑श्रवं ।

न ह्य॑स्या अप॒रंच॒न ज॒रसा॒ मर॑ते॒ पतिः॑ ॥ (TS 1.7.13.1)

इन्द्रं॑ ँवो वि॒श्वत॒स्परि॒ हवा॑महे॒ जने᳚भ्यः ।

अ॒स्माक॑मस्तु॒ केव॑लः ॥ (TS 1.6.12.1)

(ॐ अधिदेवता प्रत्यधिदेवता सहिताय भगवते शुक्रा॑य॒ नमः॑) 3

प्रत्यधिदेवता - गौरी)

ॐ आप्या॑यस्व॒ समे॑तु ते वि॒श्वत॑-स्सोम॒ वृष्णि॑यं ।

भवा॒ वाज॑स्य संग॒थे ॥ (TS 4.2.7.4)

अ॒फ्सुमे॒ सोमो॑ अब्रवीद॒न्तर् विश्वा॑नि भेष॒जा ।

अ॒ग्निञ्च॑ वि॒श्वश॑भुंव॒-माप॑श्च वि॒श्वभे॑षजीः ॥ (TB 2.5.8.6)

गौ॒री मि॑माय सलि॒लानि॒ तक्ष॒त्येक॑पदी द्वि॒पदी॒ सा चतु॑ष्पदी ।

अ॒ष्टाप॑दी॒ नव॑पदी बभू॒वुषी॑ स॒हस्रा᳚क्षरा पर॒मे व्यो॑मन्न् ॥ (TB .2.4.6.11)

(ॐ अधिदेवता प्रत्यधिदेवता सहिताय भगवते सोमा॑य॒ नमः॑) 4

प्रत्यधिदेवता - पुरुष नारायणः)

ॐ उद्बु॑द्ध्यस्वाग्ने॒ प्रति॑जागृह्येन मिष्टापू॒र्त्ते सꣳ सृ॑जेथा म॒यञ्च॑ ।

पुनः॑ कृ॒ण्वᳺस्त्वा॑ पि॒तरं॒ ँयुवा॑न-म॒न्वाताꣳ॑सी॒त् त्वयि॒ तन्तु॑मे॒तं ॥ (TS 4.7.13.5)

इ॒दं ँविष्णु॒र् विच॑क्रमे त्रे॒धा निद॑धे प॒दं ।

समू॑ढमस्य पाꣳ सु॒रे ॥ (TS 1.2.13.1)

विष्णो॑ र॒राट॑मसि॒ विष्णोः᳚ पृ॒ष्ठम॑सि॒ विष्णो॒-श्नप्त्रे᳚स्थो॒ विष्णो॒ स्स्यूर॑सि॒ विष्णो᳚र् धृ॒वम॑सि वैष्ण॒वम॑सि॒ विष्ण॑वे त्वा ॥ (TS 1.2.13.3)

(ॐ अधिदेवता प्रत्यधिदेवता सहिताय भगवते बुधा॑य॒ नमः॑) 5

प्रत्यधिदेवता - ब्रह्म)

ॐ बृह॑स्पते॒ अति॒ यद॒र्यो अर्.ह᳚द् द्यु॒मद्-वि॒भाति॒ क्रतु॑ म॒ज्जने॑षु ।

यद्दी॒द य॒च्छ व॑सर्त्त प्रजात॒ तद॒स्मासु॒ द्रवि॑णं धेहि चि॒त्रं ॥ (TS 1.8.22.2)

इन्द्र॑मरुत्व इ॒ह पा॑हि॒ सोमं॒ ँयथा॑ शार्या॒ते अपि॑बस्सु॒तस्य॑ ।

तव॒ प्रणी॑ती॒ तव॑ शूर॒ शर्म॒न्ना-वि॑वासन्ति क॒वयः॑ सुय॒ज्ञाः ॥ (TS 1.4.18.1)

ब्रह्म॑जज्ञा॒नं प्र॑थ॒मं पु॒रस्ता॒द् विसी॑म॒त-स्सु॒रुचो॑ वे॒न आ॑वः ।

सबु॒द्ध्निया॑ उप॒मा अ॑स्य वि॒ष्ठास्स॒तश्च॒ योनि॒म-स॑तश्च॒ विवः॑ ॥ (TS 4.2.8.2)

(ॐ अधिदेवता प्रत्यधिदेवता सहिताय भगवते बृह॒स्पत॑ये॒ नमः॑) 6

प्रत्यधिदेवता - यमः)

ॐ शन्नो॑ दे॒वी-र॒भिष्ट॑य॒ आपो॑ भवन्तु पी॒तये᳚ ।

शं ँयोर॒भि-स्र॑वन्तु नः ॥ (TA 7.42.4)

प्रजा॑पते॒ न त्वदे॒ता-न्य॒न्यो विश्वा॑ जा॒तानि॒ परि॒ता ब॑भूव ।

यत्का॑मास्ते जुहु॒मस्तन्नो॑ अस्तु व॒यᳺ स्या॑म॒ पत॑यो रयी॒णां ॥ (TS 1.8.14.2)

इ॒मं ँय॑म प्रस्त॒रमाहि सीदाङ्गि॑रोभिः पि॒तृभिः॑ सम् ँविदा॒नः ।

आत्वा॒ मन्त्राः᳚ कविश॒स्ता व॑हन्त्वे॒ना रा॑जन् ह॒विषा॑ मादयस्व ॥ (TS 2.6.12.6)

(ॐ अधिदेवता प्रत्यधिदेवता सहिताय भगवते शनैश्च॑राय॒ नमः॑) 7

ॐ कया॑ नश्चि॒त्र आभु॑वदू॒ती स॒दावृ॑ध॒ स्सखा᳚ ।

कया॒ शचि॑ष्ठया वृ॒ता ॥ (TS 4.2.11.2)

आऽयङ्कौः पृश्नि॑रक्रमी॒-दस॑नन् मा॒तरं॒ पुनः॑ ।

पि॒तर॑ञ्च प्र॒यन्थ्सुवः॑ ॥ (TS 1.5.3.1)

यत्ते॑ दे॒वी निर्.ऋ॑ति राब॒बन्ध॒ दाम॑ ग्री॒वास्व॑-विच॒र्त्यं ।

इ॒दन्ते॒ तद्विष्या॒-म्यायु॑षो॒ न मद्ध्या॒-दथा॑ जी॒वः

पि॒तुम॑द्धि॒ प्रमु॑क्तः ॥ (TS 4.2.5.3)

(ॐ अधिदेवता प्रत्यधिदेवता सहिताय भगवते राह॑वे॒ नमः॑) 8

प्रत्यधिदेवता - चित्रगुप्तः)

ॐ के॒तुं कृ॒ण्वन्न॑के॒तवे॒ पेशो॑ मर्या अपे॒शसे᳚ ।

समु॒षद्भि॑रजायथाः ॥ (TS 7.4.20.1)

ब्र॒ह्मा दे॒वानां᳚ पद॒वीः क॑वी॒ना-मृषि॒र्विप्रा॑णां महि॒षो मृ॒गाणां᳚ ।

श्ये॒नो गृद्ध्रा॑णा॒ᳺ॒ स्वधि॑ति॒र् वना॑ना॒ꣳ॒ सोमः॑ प॒वित्र॒ मत्ये॑ति॒ रेभन्न्॑ ॥ (TS 3.4.11.1)

सचि॑त्र चि॒त्रं चि॒तय॑न्त-म॒स्मे चित्र॑क्षत्र चि॒त्रत॑मं ँवयो॒धां ।

च॒न्द्रं र॒यिं पु॑रु॒वीरं॑ बृ॒हन्तं॒ चन्द्र॑-च॒न्द्राभि॑र्-गृण॒ते यु॑वस्व ॥ (RV 6.6.7).

(ॐ अधिदेवता प्रत्यधिदेवता सहितेभ्यो भगवद्भ्यः केतु॑भ्यो॒ नमः॑) 9

॥ ॐ आदित्यादि नवग्रह देव॑ताभ्यो॒ नमो॒ नमः॑॥

(ॐ शान्तिः॒ शान्तिः॒ शान्तिः॑ ॥)

1. (देवता - इन्द्रः) (दिक् - पूर्वं) (TS 1.6.12.5)

त्रा॒तार॒मिन्द्र॑-मवि॒तार॒-मिन्द्र॒ꣳ॒ हवे॑ हवे सु॒हव॒ꣳ॒ शूर॒मिन्द्रं᳚ ।

हु॒वे नु श॒क्रं पु॑रुहू॒त-मिन्द्रᳺ॑ स्व॒स्ति नो॑ म॒घवा॑ धा॒त्विन्द्रः॑ ॥ 1

2. (देवता-अग्नीः) (दिक्-दक्षिण पूर्वं/आग्नेय दिक्) (T.S.2.5.12.3)

त्वन्नो॑ अग्ने॒ वरु॑णस्य वि॒द्वान् दे॒वस्य॒ हेडोऽव॑ यासिसीष्ठाः ।

यजि॑ष्ठो॒ वह्नि॑तम॒ श्शोशु॑चानो॒ विश्वा॒ द्वेषाꣳ॑सि॒ प्रमु॑मुग्ध्य॒स्मत् ॥ 2

3. (देवता - यमः) (दिक् - दक्षिणं) (T.B.3.1.2.11)

सु॒गन्नः॒ पन्था॒मभ॑यं कृणोतु । यस्मि॒न्नक्ष॑त्रे य॒म एति॒ राजा᳚ ।

यस्मि॑न्नेन-म॒भ्यषि॑ञ्चन्त दे॒वाः । तद॑स्य चि॒त्रꣳ ह॒विषा॑ यजाम ।

अप॑ पा॒प्मानं॒ भर॑णीर् भरन्तु ॥ 3

4. (देवता- निर्.ऋतिः) (दिक् - दक्षिण पश्चिमं) (TS 4.2.5.4)

असु॑न्वन्त॒-मय॑जमान-मिच्छ स्ते॒न-स्ये॒त्यान् तस्क॑र॒स्यान्वे॑षि ।

अ॒न्य-म॒स्म-दि॑च्छ॒ सा त॑ इ॒त्या नमो॑ देवि निर्.ऋते॒ तुभ्य॑मस्तु ॥ 4

5. (देवता- वरुणः) (दिक् - पश्चिमं) (TS 2.1.11.6)

तत्वा॑ यामि॒ ब्रह्म॑णा॒ वन्द॑मान॒-स्तदाशा᳚स्ते॒ यज॑मानो ह॒विर्भिः॑ ।

अहे॑डमानो वरुणे॒ह बो॒द्ध्युरु॑शꣳ स॒ मा न॒ आयुः॒ प्रमो॑षीः ॥ 5

6. (देवता - वायुः) (दिक् - उत्तर पश्चिमं) (T.B.2.8.1.2)

आ नो॑ नि॒युद्भि॑-श्श॒तिनी॑-भिरध्व॒रं । स॒ह॒स्रिणी॑भि॒-रुप॑याहि य॒ज्ञं ।

वायो॑ अ॒स्मिन्. ह॒विषि॑ मादयस्व ।

यू॒यं पा॑त स्व॒स्ति-भि॒स्सदा॑नः ॥ 6

7. (देवता - सोमः) (दिक् - उत्तरं) (T.B.2.4.2.7)

व॒यꣳ सो॑म व्र॒ते तव॑ । मन॑स्त॒नूषु॒ बिभ्र॑तः । प्र॒जाव॑न्तो अशीमहि ॥ 7

8. (देवता - ईशानः) (दिक् - उत्तर पूर्वं) (RV.1.89.5)

तमीशा᳚नं॒ जग॑त-स्त॒स्थु-ष॒स्पतिं᳚ । धि॒यं॒ जि॒न्वमव॑से हूमहे व॒यं ।

पू॒षा नो॒ यथा॒ वेद॑ सा॒मस॑द्वृ॒धे र॑क्षि॒ता पा॒यु-रद॑ब्ध-स्स्व॒स्तये᳚ ॥ 8

9. (देवता - ब्रह्मा) (दिक् - ऊद्‌र्ध्व्ं Skywards) (RV.8.63.1.2)

अ॒स्मे रु॒द्रा मे॒हना॒ पर्व॑तासो वृ॒त्रहत्ये॒ भर॑हूतौ स॒जोषाः᳚ ।

यश्शंस॑ते स्तुव॒ते धायि॑ प॒ज्र इन्द्र॑ज्येष्ठा अ॒स्मा अ॑वन्तु दे॒वाः ॥ 9

10. (देवता - विष्णुः) [दिक् - अधरं (पाताळं)] (TA. 6.1.10)

स्यो॒ना पृ॑थि॒वि भवा॑ऽनृक्ष॒रा नि॒वेश॑नी । यच्छा॑ न॒श्शर्म॑ स॒प्रथाः᳚ ॥ 10

(Starting from TB 3.1.1, for item no. 1 to 40)

अ॒ग्निनः॑ पातु॒ कृत्ति॑काः । नक्ष॑त्रं दे॒वमि॑न्द्रि॒यं ।

इ॒दमा॑सां- ँविचक्ष॒णं । ह॒विरा॒सन् जु॑होतन ।

यस्य॒ भान्ति॑ र॒श्मयो॒ यस्य॑ के॒तवः॑ । यस्ये॒मा विश्वा॒ भुव॑नानि॒ सर्वा᳚ ।

स कृत्ति॑का भिर॒भि-सं॒ ँवसा॑नः । अ॒ग्निर्नो॑ दे॒वस्सु॑वि॒ते द॑धातु ॥ 1

प्र॒जाप॑ते रोहि॒णी वे॑तु॒ पत्नी᳚ । वि॒श्वरू॑पा बृह॒ती चि॒त्रभा॑नुः ।

सा नो॑ य॒ज्ञस्य॑ सुवि॒ते द॑धातु । यथा॒ जीवे॑म श॒रद॒स्सवी॑राः ।

रो॒हि॒णी दे॒व्युद॑गात् पु॒रस्ता᳚त् । विश्वा॑ रू॒पाणि॑ प्रति॒मोद॑माना ।

प्र॒जाप॑तिꣳ ह॒विषा॑ व॒द्‌र्धय॑न्ती । प्रि॒या दे॒वाना॒-मुप॑यातु य॒ज्ञं ॥ 2

सोमो॒ राजा॑ मृगशी॒र्॒.षेण॒ आगन्न्॑ । शि॒वं नक्ष॑त्रं प्रि॒यम॑स्य॒ धाम॑ ।

आ॒प्याय॑मानो बहु॒॒धा जने॑षु । रेतः॑ प्र॒जां ँयज॑माने दधातु ।

यत्ते॒ नक्ष॑त्रं मृगशी॒र्॒.षमस्ति॑ । प्रि॒यꣳ रा॑जन् प्रि॒यत॑मं प्रि॒याणां᳚ ।

तस्मै॑ ते सोम ह॒विषा॑ विधेम । शन्न॑ एधि द्वि॒पदे॒ शंचतु॑ष्पदे ॥ 3

आ॒र्द्रया॑ रु॒द्रः प्रथ॑मा न एति । श्रेष्ठो॑ दे॒वानां॒ पति॑रघ्नि॒यानां᳚ ।

नक्ष॑त्रमस्य ह॒विषा॑ विधेम । मा नः॑ प्र॒जाꣳ री॑रिष॒न् मोत वी॒रान् ।

हे॒ती रु॒द्रस्य॒ परि॑णो वृणक्तु । आ॒र्द्रा नक्ष॑त्रं जुषताꣳ ह॒विर्नः॑ ।

प्र॒मु॒ञ्चमा॑नौ दुरि॒तानि॒ विश्वा᳚ । अपा॒घशꣳ॑ सन्नु-दता॒मरा॑तिं ॥ 4

पुन॑र्नो दे॒व्यदि॑ति-स्पृणोतु । पुन॑र्वसू नः॒ पुन॒रेतां᳚ ँय॒ज्ञं ।

पुन॑र्नो दे॒वा अ॒भिय॑न्तु॒ सर्वे᳚ । पुनः॑ पुनर्वो ह॒विषा॑ यजामः ।

ए॒वा न दे॒व्य-दि॑तिरन॒र्वा । विश्व॑स्य भ॒र्त्री जग॑तः प्रति॒ष्ठा ।

पुन॑र्वसू ह॒विषा॑ व॒द्‌र्धय॑न्ती । प्रि॒यं दे॒वाना॒-मप्ये॑तु॒ पाथः॑ ॥ 5

बृह॒स्पतिः॑ प्रथ॒मञ्जाय॑मानः । ति॒ष्यं॑ नक्ष॑त्रम॒भि संब॑भूव ।

श्रेष्ठो॑ दे॒वानां॒ पृत॑नासु जि॒ष्णुः । दिशो नु॒ सर्वा॒ अभ॑यन्नो अस्तु ।

ति॒ष्यः॑ पु॒रस्ता॑दु॒त म॑द्ध्य॒तो नः॑ । बृह॒स्पति॑र् नः॒ परि॑पातु प॒श्चात् ।

बाधे॑ ता॒न् द्वेषो॒ अभ॑यं कृणुतां । सु॒वीर्य॑स्य॒ पत॑यस्स्याम ॥ 6

इ॒दꣳ स॒र्पेभ्यो॑ ह॒विर॑स्तु॒ जुष्टं᳚ । आ॒श्रे॒षा येषा॑ मनु॒यन्ति॒ चेतः॑ ।

ये अ॒न्तरि॑क्षं पृथि॒वीं-क्षि॒यन्ति॑ । तेन॑ स्स॒र्पासो॒ हव॒माग॑मिष्ठाः ।

ये रो॑च॒ने सूर्य॒स्यापि॑ स॒र्पाः । ये दिवं॑ दे॒वी-मनु॑स॒ञ्चर॑न्ति ।

येषा॑माश्रे॒षा अ॑नु॒यन्ति॒ कामं᳚ । तेभ्य॑-स्स॒र्पेभ्यो॒ मधु॑-मज्जुहोमि ॥ 7

उप॑हूताः पि॒तरो॒ ये म॒घासु॑ । मनो॑जवस-स्सु॒कृत॑-स्सुकृ॒त्याः ।

ते नो॒ नक्ष॑त्रे॒ हव॒माग॑मिष्ठाः । स्व॒धाभि॑र् य॒ज्ञं प्रय॑तं जुषन्तां ।

ये अ॑ग्निद॒ग्धा येऽन॑ग्नि-दग्धाः । ये॑ऽमुल्लो॒कं पि॒तरः॑ क्षि॒यन्ति॑ ।

याᳺश्च॑ वि॒द्मयाꣳ उ॑ च॒ न प्र॑वि॒द्म । म॒घासु॑ य॒ज्ञꣳ सुकृ॑तं जुषन्तां ॥ 8

गवां॒ पतिः॒ फल्गु॑नी-नामसि॒ त्वं । तद॑र्यमन् वरुण मित्र॒ चारु॑ ।

तन्त्वा॑ व॒यꣳ स॑नि॒तारꣳ॑ सनी॒नां । जी॒वा जीव॑न्त॒मुप॒ सं ँवि॑शेम ।

येने॒मा विश्वा॒ भुव॑नानि॒ सञ्जि॑ता । यस्य॑ दे॒वा अ॑नुस॒ ँय्यन्ति॒ चेतः॑ ।

अ॒र्य॒मा राजा॒ऽजर॒स्तु वि॑ष्मान् । फल्गु॑नीना-मृष॒भो रो॑रवीति ॥ 9

श्रेष्ठो॑ दे॒वानां᳚ भगवो भगासि । तत्त्वा॑ विदुः॒ फल्गु॑नी॒-स्तस्य॑ वित्तात् ।

अ॒स्मभ्यं॑-क्ष॒त्रम॒जरꣳ॑ सु॒वीर्यं᳚ । गोम॒दश्व॑-व॒दुप॒सन्नु॑-दे॒ह ।

भगो॑ह दा॒ता भग॒ इत्प्र॑दा॒ता । भगो॑ दे॒वीः फल्गु॑नी॒-रावि॑वेश ।

भग॒स्येत्तं प्र॑स॒वं ग॑मेम । यत्र॑ दे॒वै-स्स॑ध॒मादं॑ मदेम ॥ 10

आया॑तु दे॒व-स्स॑वि॒तो प॑यातु । हि॒र॒ण्यये॑न सु॒वृता॒ रथे॑न ।

वह॒न॒. हस्तꣳ॑ सु॒भगं॑ ँविद्म॒नाप॑सं । प्र॒यच्छ॑न्तं॒ पपु॑रिं॒ पुण्य॒मच्छ॑ ।

हस्तः॒ प्रय॑च्छ त्व॒मृतं॒ वसी॑यः । दक्षि॑णेन॒ प्रति॑गृभ्णीम एनत् ।

दा॒तार॑-म॒द्य स॑वि॒ता वि॑देय । यो नो॒ हस्ता॑य प्रसु॒वाति॑ य॒ज्ञं ॥ 11

त्वष्टा॒ नक्ष॑त्र-म॒भ्ये॑ति चि॒त्रां । सु॒भꣳ स॑सं- ँयुव॒तिꣳ रोच॑मानां ।

नि॒वे॒शय॑-न्न॒मृता॒न् मर्त्याᳺ॑श्च । रू॒पाणि॑ पि॒ꣳ॒शन् भुव॑नानि॒ विश्वा᳚ ।

तन्न॒स्त्वष्टा॒ तदु॑ चि॒त्रा विच॑ष्टां । तन्नक्ष॑त्रं भूरि॒दा अ॑स्तु॒ मह्यं᳚ ।

तन्नः॑ प्र॒जां ँवी॒रव॑तीꣳ सनोतु । गोभि॑र्नो॒ अश्वै॒-स्सम॑नक्तु य॒ज्ञं ॥ 12

वा॒युर् नक्ष॑त्र-म॒भ्ये॑ति॒ निष्ट्यां᳚ । ति॒ग्मश्रृं॑गो वृष॒भो रोरु॑वाणः ।

स॒मी॒रय॒न् भुव॑ना मात॒रिश्वा᳚ । अप॒ द्वेषाꣳ॑सि नुदता॒मरा॑तीः ।

तन्नो॑ वा॒यस्तदु॒ निष्ट्या॑ श्रृणोतु । तन्नक्ष॑त्रं भूरि॒दा अ॑स्तु॒ मह्यं᳚ ।

तन्नो॑ दे॒वासो॒ अनु॑ जानन्तु॒ कामं᳚ । यथा॒ तरे॑म दुरि॒तानि॒ विश्वा᳚ ॥ 13

दू॒रम॒स्मच्छत्र॑वो यन्तु भी॒ताः । तदि॑न्द्रा॒ग्नी कृ॑णुतां॒ तद् विशा॑खे ।

तन्नो॑ दे॒वा अनु॑मदन्तु य॒ज्ञं । प॒श्चात् पु॒रस्ता॒-दभ॑यन्नो अस्तु ।

नक्ष॑त्राणा॒-मधि॑पत्नी॒ विशा॑खे । श्रेष्ठा॑-विन्द्रा॒ग्नी भुव॑नस्य गो॒पौ ।

विषू॑च॒-श्शत्रू॑नप॒बाध॑मानौ । अप॒क्षुध॑-न्नुदता॒मरा॑तिं ॥ 14

पू॒र्णा प॒श्चादु॒त पू॒र्णा पु॒रस्ता᳚त् । उन्म॑द्ध्य॒तः पौ᳚र्णमा॒सी जि॑गाय ।

तस्यां᳚ दे॒वा अधि॑ सं॒ ँवस॑न्तः । उ॒त्त॒मे नाक॑ इ॒ह मा॑दयन्तां ।

पृ॒थ्वी सु॒वर्चा॑ युव॒ति-स्स॒जोषाः᳚ । पौ॒र्ण॒मा॒स्युद॑गा॒-च्छोभ॑माना ।

आ॒प्या॒यय॑न्ती दुरि॒तानि॒ विश्वा᳚ । उ॒रुं दुहां॒ य ँज॑मानाय य॒ज्ञं ॥ 15

ऋ॒द्ध्यास्म॑ ह॒व्यैर् नम॑सोप॒-सद्य॑ । मि॒त्रं दे॒वं मि॑त्र॒धेय॑न्नो अस्तु ।

अ॒नू॒रा॒धान्. ह॒विषा॑ व॒र्द्धय॑न्तः । श॒तं जी॑वेम श॒रद॒स्सवी॑राः ।

चि॒त्रं-नक्ष॑त्र॒-मुद॑गात् पु॒रस्ता᳚त् । अ॒नू॒रा॒धा स॒ इति॒ यद् वद॑न्ति ।

तन्मि॒त्र ए॑ति प॒थिभि॑ र्देव॒यानैः᳚ । हि॒र॒ण्ययै॒र् वित॑तै-र॒न्तरि॑क्षे ॥ 16

इन्द्रो᳚ ज्ये॒ष्ठा मनु॒ नक्ष॑त्रमेति । यस्मि॑न् वृ॒त्रं ँवृ॑त्र॒ तूर्ये॑ त॒तार॑ ।

तस्मि॑न् व॒य-म॒मृतं॒ दुहा॑नाः । क्षुध॑न्तरेम॒ दुरि॑तिं॒ दुरि॑ष्टिं ।

पु॒र॒न्द॒राय॑ वृष॒भाय॑ धृ॒ष्णवे᳚ । अषा॑ढाय॒ सह॑मानाय मी॒ढुषे᳚ ।

इन्द्रा॑य ज्ये॒ष्ठा मधु॑म॒द्दुहा॑ना । उ॒रुं कृ॑णोतु॒ यज॑मानाय लो॒कं ॥ 17

मूलं॑ प्र॒जां वी॒रव॑तीं ँविदेय । परा᳚च्येतु॒ निर्.ऋ॑तिः परा॒चा ।

गोभि॒र् नक्ष॑त्रं प॒शुभि॒-स्सम॑क्तं । अह॑र् भूया॒द् यज॑मानाय॒ मह्यं᳚ ।

अह॑र्नो अ॒द्य सु॑वि॒ते द॑धातु । मूलं॒ नक्ष॑त्र॒मिति॒ यद् वद॑न्ति ।

परा॑चीं ँवा॒चा निर्.ऋ॑तिं नुदामि । शि॒वं प्र॒जायै॑ शि॒वम॑स्तु॒ मह्यं᳚ ॥ 18

या दि॒व्या आपः॒ पय॑सा संबभू॒वुः । या अ॒न्तरि॑क्ष उ॒त पार्त्थि॑वी॒र्याः ।

यासा॑मषा॒ढा अ॑नु॒यन्ति॒ कामं᳚ । ता न॒ आपः॒ शᳺ स्यो॒ना भ॑वन्तु ।

याश्च॒ कूप्या॒ याश्च॑ ना॒द्या᳚-स्समु॒द्रियाः᳚ । याश्च॑ वैश॒न्तीरु॒त प्रा॑स॒चीर्याः ।

यासा॑मषा॒ढा मधु॑ भ॒क्षय॑न्ति । ता न॒ आपः॒ शᳺ स्यो॒ना भ॑वन्तु ॥ 19

तन्नो॒ विश्वे॒ उप॑ श्रृण्वन्तु दे॒वाः । तद॑षा॒ढा अ॒भिसं ँय॑न्तु य॒ज्ञं ।

तन्नक्ष॑त्रं प्रथतां प॒शुभ्यः॑ । कृ॒षिर्-वृ॒ष्टिर् यज॑मानाय कल्पतां ।

शु॒भ्राः क॒न्या॑ युव॒तय॑-स्सु॒पेश॑सः । क॒र्म॒कृत॑-स्सु॒कृतो॑ वी॒र्या॑वतीः ।

विश्वा᳚न् दे॒वान्. ह॒विषा॑ व॒र्द्धय॑न्तीः ।

अ॒षा॒ढाः काम॒ मुप॑यान्तु य॒ज्ञं ॥ 20

यस्मि॒न् ब्रह्मा॒भ्यज॑य॒थ् सर्व॑मे॒तत् । अ॒मुञ्च॑ लो॒क मि॒दमू॑च॒ सर्वं᳚ ।

तन्नो॒ नक्ष॑त्र-मभि॒जिद् वि॒जित्य॑ । श्रियं॑ दधा॒त्व-हृ॑णीयमानं ।

उ॒भौ लो॒कौ ब्रह्म॑णा॒ सञ्जि॑ते॒मौ । तन्नो॒ नक्ष॑त्र-मभि॒जिद् विच॑ष्टां ।

तस्मि॑न् व॒यं पृत॑ना॒ स्संज॑येम । तन्नो॑ दे॒वासो॒ अनु॑जानन्तु॒ कामं᳚ ॥ 21

शृ॒ण्वन्ति॑ श्रो॒णा-म॒मृत॑स्य गो॒पां । पुण्या॑मस्या॒ उप॑शृणोमि॒ वाचं᳚ ।

म॒हीं दे॒वीं विष्णु॑पत्नी मजू॒र्यां । प्र॒तीची॑ मेनाꣳ ह॒विषा॑ यजामः ।

त्रे॒धा विष्णु॑-रुरुगा॒यो विच॑क्रमे । म॒हीं दिवं॑ पृथि॒वी-म॒न्तरि॑क्षं ।

तच्छ्रो॒णैति॒ श्रव॑-इ॒च्छमा॑ना । पुण्य॒ᳺ॒ श्लोकं॒ ँयज॑मानाय कृण्व॒ती ॥ 22

अ॒ष्टौ दे॒वा वस॑वस्सो॒म्यासः॑ । चत॑स्रो दे॒वी र॒जराः॒ श्रवि॑ष्ठाः ।

ते य॒ज्ञं पा᳚न्तु॒ रज॑सः प॒रस्ता᳚त् । सं॒ ँव॒थ्स॒रीण॑-म॒मृतᳺ॑ स्व॒स्ति ।

य॒ज्ञं नः॑ पान्तु॒ वस॑वः पु॒रस्ता᳚त् । द॒क्षि॒ण॒तो॑-ऽभिय॑न्तु॒ श्रवि॑ष्ठाः ।

पुण्य॒न्नक्ष॑त्रम॒भि सं ँवि॑शाम । मा नो॒ अरा॑ति-र॒घश॒ꣳ॒ सागन्न्॑ ॥ 23

क्ष॒त्रस्य॒ राजा॒ वरु॑णोऽधिरा॒जः । नक्ष॑त्राणाꣳ श॒तभि॑ष॒ग् वसि॑ष्ठः ।

तौ दे॒वेभ्यः॑ कृणुतो दी॒र्घमायः॑ । श॒तꣳ स॒हस्रा॑ भेष॒जानि॑ धत्तः ।

य॒ज्ञन्नो॒ राजा॒ वरु॑ण॒ उप॑यातु । तन्नो॒ विश्वे॑ अ॒भिस ँय्य॑न्तु दे॒वाः ।

तन्नो॒ नक्ष॑त्रꣳ श॒तभि॑षग् जुषा॒णं । दी॒र्घमायुः॒ प्रति॑रद् भेष॒जानि॑ ॥ 24

अ॒ज एक॑पा॒- दुद॑गात् पु॒रस्ता᳚त् । विश्वा॑ भू॒तानि॑ प्रति॒ मोद॑मानः ।

तस्य॑ दे॒वाः प्र॑स॒वं ँय॑न्ति॒ सर्वे᳚ । प्रो॒ष्ठ॒प॒दासो॑ अ॒मृत॑स्य गो॒पाः ।

वि॒भ्राज॑मान-स्समिधा॒न उ॒ग्रः । आऽन्तरि॑क्ष-मरुह॒द-ग॒न्द्यां ।

तꣳ सूर्यं॑ दे॒व-म॒जमेक॑पादं । प्रो॒ष्ठ॒प॒दासो॒ अनु॑यन्ति॒ सर्वे᳚ ॥ 25

अहि॑र् बु॒द्ध्नियः॒ प्रथ॑मान एति । श्रेष्ठो॑ दे॒वाना॑मु॒त मानु॑षाणां ।

तं ब्रा᳚ह्म॒णा-स्सो॑म॒पा-स्सो॒म्यासः॑ । प्रो॒ष्ठ॒प॒दासो॑ अ॒भिर॑क्षन्ति॒ सर्वे᳚ ।

च॒त्वार॒ एक॑म॒भि कर्म॑ दे॒वाः । प्रो॒ष्ठ॒प॒दास॒ इति॒ यान्. वद॑न्ति ।

ते बु॒द्धनियं॑ परि॒षद्यᳺ॑ स्तु॒वन्तः॑ । अहिꣳ॑ रक्षन्ति॒ नम॑सोप॒ सद्य॑ ॥ 26

पू॒षा रे॒वत्यन्वे॑ति॒ पन्थां᳚ । पु॒ष्टि॒पती॑ पशु॒पा वाज॑बस्त्यौ ।

इ॒मानि॑ ह॒व्या प्रय॑ता जुषा॒णा । सु॒गैर्नो॒ यानै॒रुप॑यातां ँय॒ज्ञं ।

क्षु॒द्रान् प॒शून् र॑क्षतु रे॒वती॑ नः । गावो॑ नो॒ अश्वा॒ꣳ॒ अन्वे॑तु पू॒षा ।

अन्न॒ꣳ॒ रक्ष॑न्तौ बहु॒॒धा विरू॑पं । वाजꣳ॑ सनुतां॒ ँयज॑मानाय य॒ज्ञं ॥ 27

तद॒श्विना॑-वश्व॒युजो-प॑यातां । शुभ॒ङ्गमि॑ष्ठौ सु॒यमे॑भि॒रश्वैः᳚ ।

स्वन्नक्ष॑त्रꣳ ह॒विषा॒ यज॑न्तौ । मद्ध्वा॒-संपृ॑क्तौ॒ यजु॑षा॒ सम॑क्तौ ।

यौ दे॒वानां᳚ भि॒षजौ॑ हव्यवा॒हौ । विश्व॑स्य दू॒ता-व॒मृत॑स्य गो॒पौ ।

तौ नक्ष॑त्रं-जुजुषा॒णो-प॑यातां । नमो॒ऽश्विभ्यां᳚ कृणुमो-ऽश्व॒ग्युभ्यां᳚ ॥ 28

अप॑ पा॒प्मानं॒ भर॑णीर् भरन्तु । तद् य॒मो राजा॒ भग॑वा॒न॒. विच॑ष्टां ।

लो॒कस्य॒ राजा॑ मह॒तो म॒हान्. हि । सु॒गन्नः॒ पन्था॒मभ॑यं कृणोतु ।

यस्मि॒न् नक्ष॑त्रे य॒म एति॒ राजा᳚ । यस्मि॑न्नेन-म॒भ्यषि॑ञ्चन्त दे॒वाः ।

तद॑स्य चि॒त्रꣳ ह॒विषा॑ यजाम । अप॑ पा॒प्मानं॒ भर॑णीर् भरन्तु ॥ 29

नि॒वेश॑नी स॒ङ्गम॑नी॒ वसू॑नां॒ ँविश्वा॑ रू॒पाणि॒ वसू᳚न्या-वे॒शय॑न्ती ।

स॒ह॒स्र॒-पो॒षꣳ सु॒भगा॒ ररा॑णा॒ सा न॒ आग॒न् वर्च॑सा सं ँविदा॒ना ।

यत्ते॑ दे॒वा अद॑धुर् भाग॒धेय॒-ममा॑वास्ये सं॒ ँवस॑न्तो महि॒त्वा ।

सा नो॑ य॒ज्ञं पि॑पृहि विश्ववारे र॒यिन्नो॑ धेहि सुभगे सु॒वीरं᳚ ॥ 30

Optional Additional Chanting (31 to 40)

नवो॑ नवो भवति॒ जाय॑मा॒नोऽह्नां᳚ के॒तु-रु॒षसा॑ मे॒त्यग्रे᳚ ।

भा॒गं दे॒वेभ्यो॒ विद॑धात्या॒यन् प्रच॒न्द्रमा᳚स्तिरति दी॒र्घमायुः॑ ॥

यमा॑दि॒त्या अ॒ꣳ॒शुमा᳚प्या॒यय॑न्ति॒ यमक्षि॑त॒-मक्षि॑तयः॒ पिब॑न्ति ।

तेन॑ नो॒ राजा॒ वरु॑णो॒ बृह॒स्पति॒ राप्या॑ययन्तु॒ भुव॑नस्य गो॒पाः ॥ 31

ये विरू॑पे॒ सम॑नसा सं ँव्यय॑न्ती । स॒मा॒नं तन्तुं॑ परिता-त॒नाते᳚ ।

वि॒भू प्र॒भू अ॑नु॒भू वि॒श्वतो॑ हुवे । ते नो॒ नक्ष॑त्रे॒ हव॒माग॑-मेतं ।

व॒यं दे॒वी ब्रह्म॑णा संवि ँदा॒नाः । सु॒रत्ना॑सो दे॒ववी॑तिं॒ दधा॑नाः ।

अ॒हो॒रा॒त्रे ह॒विषा॑ व॒र्द्धय॑न्तः । अति॑ पा॒प्मान॒-मति॑मुक्त्या गमेम ॥ 32

प्रत्यु॑व दृश्याय॒ती । व्यु॒च्छन्ती॑ दुहि॒ता दि॒वः ।

अ॒पो म॒ही वृ॑णुते॒ चक्षु॑षा । तमो॒ ज्योति॑ष्‌कृणोति सू॒नरी᳚ ।

उदु॒ स्त्रिया᳚स्सचते॒ सूर्यः॑ । स चा॑ उ॒द्यन्नक्ष॑त्र मर्चि॒मत् ।

त वेदु॑षो॒ व्युषि॒ सूर्य॑स्य च । संभ॒क्तेन॑ गमेमहि ॥ 33

तन्नो॒ नक्ष॑त्र मर्चि॒मत् । भा॒नु॒मत्तेज॑ उ॒च्छर॑त् ।

उप॑य॒ज्ञ-मि॒हाग॑मत् । प्रनक्ष॑त्राय दे॒वाय॑ । इन्द्रा॒येन्दुꣳ॑ हवामहे ।

स न॑ स्सवि॒ता सु॑वथ् स॒निं । पु॒ष्टि॒दां ँवी॒रव॑त्तमं ॥ 34

उदु॒त्यं जा॒तवे॑दसं दे॒वं ँव॑हन्ति के॒तवः॑ । दृ॒शे विश्वा॑य॒ सूर्यं᳚ ।

चि॒त्रं दे॒वाना॒ मुद॑गा॒दनी॑कं॒ चक्षु॑र् मि॒त्रस्य॒ वरु॑णस्या॒ग्नेः ।

आऽप्रा॒ द्यावा॑पृथि॒वी अ॒न्तरि॑क्ष॒ꣳ॒ सूर्य॑ आ॒त्मा जग॑तस्त॒स्थुष॑श्च ॥ 35

अदि॑तिर्न उरुष्य॒-त्वदि॑तिः॒ शर्म॑ यच्छतु । अदि॑तिः पा॒त्वꣳ ह॑सः।

म॒हीमू॒षु मा॒तरꣳ॑ सुव्र॒ताना॑-मृ॒तस्य॒ पत्नी॒ मव॑से हुवेम ।

तु॒वि॒क्ष॒त्रा-म॒जर॑न्ती मुरू॒चीꣳ सु॒शर्मा॑ण॒-मदि॑तिꣳ सु॒प्रणी॑तिं ॥ 36

इ॒दं ँविष्णु॒र् विच॑क्रमे त्रे॒धा निद॑धे प॒दं । समू॑ढमस्य पाꣳ सु॒रे ।

प्रतद्विष्णु॑स् स्तवते वी॒र्या॑य । मृ॒गो न भी॒मः कु॑च॒रो गि॑रि॒ष्ठाः ।

यस्यो॒रुषु॑ त्रि॒षु वि॒क्रम॑णेषु । अधि॑क्षि॒यन्ति॒ भुव॑नानि॒ विश्वा᳚ ॥ 37

अ॒ग्निर् मू॒द्‌र्धा दि॒वः क॒कुत्पतिः॑ पृथि॒व्या अ॒यं ।

अ॒पाꣳ रेताꣳ॑सि जिन्वति ।

भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भिः॒ सच॑से शि॒वाभिः॑ ।

दि॒वि मू॒द्‌र्धानं॑ दधिषे सुव॒र्॒.षां जि॒ह्वाम॑ग्ने चकृषे हव्य॒वाहं᳚ ॥ 38

अनु॑नो॒ऽद्यानु॑मतिर् य॒ज्ञं दे॒वेषु॑ मन्यतां ।

अ॒ग्निश्च॑ हव्य॒वाह॑नो॒ भव॑तां दा॒शुषे॒ मयः॑ ।

अन्विद॑नुमते॒ त्वं मन्या॑सै॒ शंच॑ नः कृधि ।

क्रत्वे॒ दक्षा॑य नो हिनु॒ प्रण॒ आयूꣳ॑षि तारिषः ॥ 39

ह॒व्य॒वाह॑मभि-माति॒षाहं᳚ । र॒क्षो॒हणं॒ पृत॑नासु जि॒ष्णुं ।

ज्योति॑ष्मन्तं॒ दीद्य॑तं॒ पुर॑न्धिं । अ॒ग्निᳺ स्वि॑ष्ट॒ कृत॒माहु॑वेम ।

स्वि॑ष्ट मग्ने अ॒भितत् पृ॑णाहि । विश्वा॑ देव॒ पृत॑ना अ॒भिष्य ।

उ॒रुन्नः॒ पन्थां᳚ प्रदि॒शन् विभा॑हि । ज्योति॑ष्मद्धेह्य॒ जर॑न्न॒ आयुः॑ ॥ 40

ॐ शन्नो॑ मि॒त्रः शं ँवरु॑णः । शन्नो॑ भवत्वर्य॒मा ।

शन्न॒ इन्द्रो॒ बृह॒स्पतिः॑ । शन्नो॒ विष्णु॑रुरुक्र॒मः ।

नमो॒ ब्रह्म॑णे । नम॑स्ते वायो ।

त्वमे॒व प्र॒त्यक्षं॒ ब्रह्मा॑सि । त्वमे॒व प्र॒त्यक्षं॒ ब्रह्म॑ वदिष्यामि ।

ऋ॒तं ँव॑दिष्यामि । स॒त्यं ँव॑दिष्यामि ।

तन्माम॑वतु । तद्व॒क्तार॑मवतु । अव॑तु॒ मां । अव॑तु व॒क्तारं᳚ ॥ 1

ॐ शान्तिः॒ शान्तिः॒ शान्तिः॑ ॥

TA 5.12.1

ॐ शन्नो॑ मि॒त्रः शं ँवरु॑णः । शन्नो॑ भवत्वर्य॒मा ।

शन्न॒ इन्द्रो॒ बृह॒स्पतिः॑ । शन्नो॒ विष्णु॑रुरुक्र॒मः । नमो॒ ब्रह्म॑णे ।

नम॑स्ते वायो । त्वमे॒व प्र॒त्यक्षं॒ ब्रह्मा॑सि । त्वामे॒व प्र॒त्यक्षं॒ ब्रह्मावा॑दिषं ।

ऋ॒तम॑वादिषं । स॒त्यम॑वादिषं । तन्मामा॑वीत् । तद्व॒क्तार॑मावीत् ।

आवी॒न्मां । आवी᳚द्व॒क्तारं᳚ ॥ 2

ॐ शान्तिः॒ शान्तिः॒ शान्तिः॑ ॥

TA 5.13.1

ॐ स॒ह ना॑ववतु । स॒ह नौ॑ भुनक्तु । स॒ह वी॒र्यं॑ करवावहै ।

ते॒ज॒स्विना॒-वधी॑तमस्तु॒ मा वि॑द्विषा॒वहै᳚ ॥ 3

ॐ शान्तिः॒ शान्तिः॒ शान्तिः॑ ॥

TA 7.1.1

नमो॑ वा॒चे या चो॑दि॒ता या चानु॑दिता॒ तस्यै॑ वा॒चे नमो॒

नमो॑ वा॒चे नमो॑ वा॒चस्पत॑ये॒ नम॒ ऋषि॑भ्यो मन्त्र॒कृद्भ्यो॒ मन्त्र॑पतिभ्यो॒

मा मामृष॑यो मन्त्र॒कृतो॑ मन्त्र॒पत॑यः॒ परा॑दु॒र्मा-ऽहमृषी᳚न् मन्त्र॒कृतो॑

मन्त्र॒पती॒न् परा॑दां ँवैश्वदे॒वीं ँवाच॑मुद्यासꣳ शि॒वा मद॑स्ता॒ञ्जुष्टां᳚

दे॒वेभ्यः॒ शर्म॑ मे॒ द्यौः शर्म॑ पृथि॒वी शर्म॒ विश्व॑मि॒दं जग॑त् ।

शर्म॑ च॒न्द्रश्च॒ सूर्य॑श्च॒ शर्म॑ ब्रह्म प्रजाप॒ती ।

भू॒तं ँव॑दिष्ये॒ भुव॑नं ँवदिष्ये॒ तेजो॑ वदिष्ये॒ यशो॑ वदिष्ये॒ तपो॑ वदिष्ये॒

ब्रह्म॑ वदिष्ये स॒त्यं ँव॑दिष्ये॒ तस्मा॑ अ॒हमि॒द-मु॑प॒स्तर॑ण॒-मुप॑स्तृण

उप॒स्तर॑णं मे प्र॒जायै॑ पशू॒नां भू॑यादुप॒स्तर॑णम॒हं प्र॒जायै॑ पशू॒नां

भू॑यासं॒ प्राणा॑पानौ मृ॒त्योर्मा॑पातं॒ प्राणा॑पानौ॒ मा मा॑ हासिष्टं॒ मधु॑

मनिष्ये॒ मधु॑ जनिष्ये॒ मधु॑ वक्ष्यामि॒ मधु॑ वदिष्यामि॒ मधु॑मतीं दे॒वेभ्यो॒

वाच॑मुद्यासꣳ शुश्रू॒षेण्यां᳚ मनु॒ष्ये᳚भ्य॒स्तं मा॑ दे॒वा अ॑वन्तु

शो॒भायै॑ पि॒तरो ऽनु॑मदन्तु ॥ 4

ॐ शान्तिः॒ शान्तिः॒ शान्तिः॑ ॥

T.B.3.5.11.1

ॐ तच्छं॒ ँयोरावृ॑णीमहे । गा॒तुं ँय॒ज्ञाय॑ । गा॒तुं ँय॒ज्ञप॑तये ।

दैवी᳚ स्व॒स्तिर॑स्तु नः । स्व॒स्तिर्-मानु॑षेभ्यः ।

ऊ॒द्‌र्ध्वं जि॑गातु भेष॒जं । शन्नो॑ अस्तु द्वि॒पदे᳚ । शं चतु॑ष्पदे ॥ 5

ॐ शान्तिः॒ शान्तिः॒ शान्तिः॑ ॥

ॐ । ग॒णाना᳚न्त्वा ग॒णप॑तिꣳ हवामहे क॒विं क॑वी॒ना-मु॑प॒मश्र॑वस्तमं ।

ज्ये॒ष्ठ॒॒राजं॒ ब्रह्म॑णां ब्रह्मणस्पत॒ आन॑श्शृ॒ण्वन्नू॒॒तिभिः॑ सीद॒ साद॑नं ॥

श्री महागणपतये नमः ॥

TS 4.7.3.1

शं च॑ मे॒ , मय॑श्च मे, प्रि॒यं च॑ मे, ऽनुका॒मश्च॑ मे॒,

काम॑श्च मे , सौमन॒सश्च॑ मे, भ॒द्रं च॑ मे॒, श्रेय॑श्च मे॒,

वस्य॑श्च मे॒, यश॑श्च मे॒, भग॑श्च मे॒, द्रवि॑णं च मे,

य॒न्ता च॑ मे, ध॒र्ता च॑ मे॒, क्षेम॑श्च मे॒, धृति॑श्च मे॒,

विश्वं॑ च मे॒, मह॑श्च मे, सं॒ ँविच्च॑ मे॒, ज्ञात्र॑ञ्च मे॒,

सूश्च॑ मे, प्र॒सूश्च॑ मे॒, सीरं॑ च मे, ल॒यश्च॑ म,

ऋ॒तं च॑ मे॒, ऽमृतं॑ च मे, ऽय॒क्ष्मं च॒ मे , ऽना॑मयच्च मे,

जी॒वातु॑श्च मे, दीर्घायु॒त्वं च॑ मे, ऽनमि॒त्रं च॒ मे, ऽभ॑यं च मे,

सु॒गं च॑ मे॒, शय॑नं च मे, सू॒षा च॑ मे, सु॒दिनं॑ च मे ॥

ॐ शान्तिः॒ शान्तिः॒ शान्तिः॑ ॥

(TS 4.5.1 - 4.5.11)

प्रथमोऽनुवाकः

ॐ नमो भगवते॑ रुद्रा॒य ॥

ॐ नम॑स्ते रुद्र म॒न्यव॑ उ॒तो त॒ इष॑वे॒ नमः॑ ।

नम॑स्ते अस्तु॒ धन्व॑ने बा॒हुभ्या॑मु॒त ते॒ नमः॑ । 1.1

या त॒ इषुः॑ शि॒वत॑मा शि॒वं ब॒भूव॑ ते॒ धनः॑ ।

शि॒वा श॑र॒व्या॑ या तव॒ तया॑ नो रुद्र मृडय । 1.2

या ते॑ रुद्र शि॒वा त॒नूरघो॒रा ऽपा॑पकाशिनी ।

तया॑ नस्त॒नुवा॒ शन्त॑मया॒ गिरि॑शन्ता॒-भिचा॑कशीहि । 1.3

यामिषुं॑ गिरिशन्त॒ हस्ते॒ बिभ॒र्ष्यस्त॑वे ।

शि॒वाङ्गि॑रित्र॒ ताङ्कु॑रु॒ मा हिꣳ॑सीः॒॒ पुरु॑षं॒ जग॑त् । 1.4

शि॒वेन॒ वच॑सा त्वा॒ गिरि॒शाच्छा॑ वदामसि ।

यथा॑ न॒स्सर्व॒मि-ज्जग॑द य॒क्ष्मꣳ सु॒मना॒ अस॑त् । 1.5

अद्ध्य॑वोचदधि-व॒क्ता प्र॑थ॒मो दैव्यो॑ भि॒षक् ।

अहीᳺ॑श्च॒॒ सर्वा᳚न् ज॒भंय॒न् थ्सर्वा᳚श्च यातु धा॒न्यः॑ । 1.6

अ॒सौ यस्ता॒म्रो अ॑रु॒ण उ॒त ब॒भृस्सु॑म॒ङ्गलः॑ ।

ये चे॒माꣳ रु॒द्रा अ॒भितो॑ दि॒क्षु श्रि॒ताः स॑हस्र॒शो ऽवै॑षा॒ꣳ॒ हेड॑ ईमहे । 1.7

अ॒सौ यो॑ ऽव॒सर्प॑ति॒ नील॑ग्रीवो॒ विलो॑हितः ।

उ॒तैनं॑ गो॒पा अ॑दृश॒न्-नदृ॑शन्-नुदहा॒र्यः॑ ।

उ॒तैनं॒- ँविश्वा॑ भू॒तानि॒ स दृ॒ष्टो मृ॑डयाति नः । 1.8

नमो॑ अस्तु॒ नील॑ग्रीवाय सहस्रा॒क्षाय॑ मी॒ढुषे᳚ ।

अथो॒ ये अ॑स्य॒ सत्वा॑नो॒ऽहं तेभ्यो॑ ऽकर॒न्नमः॑ ।1.9

प्रमु॑ञ्च॒ धन्व॑न॒- स्त्वमु॒भयो॒-रार्त्नि॑यो॒र्ज्यां ।

याश्च॑ ते॒ हस्त॒ इष॑वः॒ परा॒ ता भ॑गवो वप । 1.10

अ॒व॒तत्य॒ धनु॒स्त्वꣳ सह॑स्राक्ष॒ शते॑षुधे ।

नि॒शीर्य॑ श॒ल्यानां॒ मुखा॑ शि॒वो नः॑ सु॒मना॑ भव । 1.11

विज्यं॒ धनुः॑ कप॒र्दिनो॒ विश॑ल्यो॒ बाण॑वाꣳ उ॒त ।

अने॑शन्न॒स्येष॑व आ॒भुर॑स्य निष॒ङ्गथिः॑ । 1.12

या ते॑ हे॒तिर्-मी॑ढुष्टम॒ हस्ते॑ ब॒भूव॑ ते॒ धनुः॑ ।

तया॒ऽस्मान् वि॒श्वत॒ स्त्वम॑य॒क्ष्मया॒ परि॑ब्भुज । 1.13

नम॑स्ते अ॒स्त्वायु॑धा॒या-ना॑तताय धृ॒ष्णवे᳚ ।

उ॒भाभ्या॑मु॒त ते॒ नमो॑ बा॒हुभ्यां॒ तव॒ धन्व॑ने । 1.14

परि॑ ते॒ धन्व॑नो हे॒तिर॒स्मान् वृ॑णक्तु वि॒श्वतः॑ ।

अथो॒ य इ॑षु॒धिस्तवा॒रे अ॒स्मन्निधे॑हि॒ तं ॥1 (1.15)

नम॑स्ते अस्तु भगवन् विश्वेश्व॒राय॑ महादे॒वाय॑ त्र्यंब॒काय॑ त्रिपुरान्त॒काय॑

त्रिकाग्नि-का॒लाय॑ कालाग्नि-रु॒द्राय॑ नीलक॒ण्ठाय॑ मृत्युञ्ज॒याय॑

सर्वेश्व॒राय॑ सदाशि॒वाय॑ (शङ्क॒राय॑) श्रीमन्-महादे॒वाय॒ नमः॑ ॥

द्वितीयोऽनुवाकः

नमो॒ हिर॑ण्य बाहवे सेना॒न्ये॑ दि॒शांच॒ पत॑ये॒ नमो॒ 2.1

नमो॑ वृ॒क्षेभ्यो॒ हरि॑केशेभ्यः पशू॒नां पत॑ये॒ नमो॒ 2.2

नम॑स्स॒स्पिञ्ज॑राय॒ त्विषी॑मते पथी॒नां पत॑ये॒ नमो॒ 2.3

नमो॑ बभ्लु॒शाय॑ विव्या॒धिने-ऽन्ना॑नां॒ पत॑ये॒ नमो॒ 2.4

नमो॒ हरि॑केशा-योपवी॒तिने॑ पु॒ष्टानां॒ पत॑ये॒ नमो॒ 2.5

नमो॑ भ॒वस्य॑ हे॒त्यै जग॑तां॒ पत॑ये॒ नमो॒ 2.6

नमो॑ रु॒द्राया॑-तता॒विने॒ क्षेत्रा॑णां॒ पत॑ये॒ नमो॒ 2.7

नमः॑ सू॒ताया-ह॑न्त्याय॒ वना॑नां॒ पत॑ये॒ नमो॒ 2.8

नमो॒ रोहि॑ताय स्थ॒पत॑ये वृ॒क्षाणां॒ पत॑ये॒ नमो॒ 2.9

नमो॑ म॒न्त्रिणे॑ वाणि॒जाय॒ कक्षा॑णां॒ पत॑ये॒ नमो॒ 2.10

नमो॑ भुव॒न्तये॑ वारिवस्कृ॒ता-यौष॑धीनां॒ पत॑ये॒ नमो॒ 2.11

नम॑ उ॒च्चैर्-घो॑षाया क्र॒न्दय॑ते पत्ती॒नां पत॑ये॒ नमो॒ 2.12

नमः॑ कृथ्स्नवी॒ताय॒ धाव॑ते॒ सत्त्व॑नां॒ पत॑ये॒ नमः॑ ॥ 2 (2.13)

तृतीयोऽनुवाकः

नम॒ स्सह॑मानाय निव्या॒धिन॑ आव्या॒धिनी॑नां॒ पत॑ये॒ नमो॒ 3.1

नमः॑ ककु॒भाय॑ निष॒ङ्गिणे᳚ स्ते॒नानां॒ पत॑ये॒ नमो॒ 3.2

नमो॑ निष॒ङ्गिण॑ इषुधि॒मते॒ तस्क॑राणां॒ पत॑ये॒ नमो॒ 3.3

नमो॒ वञ्च॑ते परि॒वञ्च॑ते स्तायू॒नां पत॑ये॒ नमो॒ 3.4

नमो॑ निचे॒रवे॑ परिच॒रायार॑ण्यानां॒ पत॑ये॒ नमो॒ 3.5

नमः॑ सृका॒विभ्यो॒ जिघाꣳ॑सद्भ्यो मुष्ण॒तां पत॑ये॒ नमो॒ 3.6

नमो॑ ऽसि॒मद्भ्यो॒ नक्तं॒ चर॑द्भ्यः प्रकृ॒न्तानां॒ पत॑ये॒ नमो॒ 3.7

नम॑ उष्णी॒षिणे॑ गिरिच॒राय॑ कुलु॒ञ्चानां॒ पत॑ये॒ नमो॒ 3.8

नम॒ इषु॑मद्भ्यो धन्वा॒विभ्य॑श्च वो॒ नमो॒ 3.9

नम॑ आतन्वा॒नेभ्यः॑ प्रति॒दधा॑नेभ्यश्च वो॒ नमो॒ 3.10

नम॑ आ॒यच्छ॑द्भ्यो विसृ॒जद्भ्य॑श्च वो॒ नमो॒ 3.11

नमोऽस्य॑द्भ्यो॒ विद्ध्य॑द्भ्यश्च वो॒ नमो॒ 3.12

नम॒ आसी॑नेभ्यः॒ शया॑नेभ्यश्च वो॒ नमो॒ 3.13

नम॑स्स्व॒पद्भ्यो॒ जाग्र॑द्भ्यश्च वो॒ नमो॒ 3.14

नम॒स्तिष्ठ॑द्भ्यो॒ धाव॑द्भ्यश्च वो॒ नमो॒ 3.15

नम॑स्स॒भाभ्य॑ स्स॒भाप॑तिभ्यश्च वो॒ नमो॒ 3.16

नमो॒ अश्वे॒भ्यो ऽश्व॑पतिभ्यश्च वो॒ नमः॑ ॥ 3 ॥ 3.17

चतुर्त्थोऽनुवाकः

नम॑ आव्या॒धिनी᳚भ्यो वि॒विद्ध्य॑न्तीभ्यश्च वो॒ नमो॒ 4.1

नम॒ उग॑णाभ्य स्तृꣳह॒तीभ्य॑श्च वो॒ नमो॒ 4.2

नमो॑ गृ॒थ्सेभ्यो॑ गृ॒थ्सप॑तिभ्यश्च वो॒ नमो॒ 4.3

नमो॒ व्राते᳚भ्यो॒ व्रात॑पतिभ्यश्च वो॒ नमो॒ 4.4

नमो॑ ग॒णेभ्यो॑ ग॒णप॑तिभ्यश्च वो॒ नमो॒ 4.5

नमो॒ विरू॑पेभ्यो वि॒श्वरू॑पेभ्यश्च वो॒ नमो॒ 4.6

नमो॑ म॒हद्भ्यः॑ क्षुल्ल॒केभ्य॑श्च वो॒ नमो॒ 4.7

नमो॑ र॒थिभ्यो॑ ऽर॒थेभ्य॑श्च वो॒ नमो॒ 4.8

नमो॒ रथे᳚भ्यो॒ रथ॑पतिभ्यश्च वो॒ नमो॒ 4.9

नमः॒ सेना᳚भ्य स्सेना॒निभ्य॑श्च वो॒ नमो॒ 4.10

नमः॑ क्ष॒त्तृभ्य॑ स्संग्रही॒तृभ्य॑श्च वो॒ नमो॒ 4.11

नम॒स्तक्ष॑भ्यो रथका॒रेभ्य॑श्च वो॒ नमो॒ 4.12

नमः॒ कुला॑लेभ्यः क॒र्मारे᳚भ्यश्च वो॒ नमो॒ 4.13

नमः॑ पु॒ञ्जिष्टे᳚भ्यो निषा॒देभ्य॑श्च वो॒ नमो॒ 4.14

नम॑ इषु॒कृद्भ्यो॑ धन्व॒कृद्भ्य॑श्च वो॒ नमो॒ 4.15

नमो॑ मृग॒युभ्य॑ श्श्व॒निभ्य॑श्च वो॒ नमो॒ 4.16

नमः॒ श्वभ्य॒ श्श्वप॑तिभ्यश्च वो॒ नमः॑ ॥ 4 4.17

पञ्चमोऽनुवाकः

नमो॑ भ॒वाय॑ च रु॒द्राय॑ च॒ नम॑श्श॒र्वाय॑ च पशु॒पत॑ये च॒

नमो॒ नील॑ग्रीवाय च शिति॒कण्ठा॑य च॒ नमः॑ कप॒र्दिने॑ च॒ व्यु॑प्तकेशाय च॒

नम॑ स्सहस्रा॒क्षाय॑ च श॒तध॑न्वने च॒ नमो॑ गिरि॒शाय॑ च शिपिवि॒ष्टाय॑ च॒

नमो॑ मी॒ढुष्ट॑माय॒ चेषु॑मते च॒ नमो᳚ ह्र॒स्वाय॑ च वाम॒नाय॑ च॒

नमो॑ बृह॒ते च॒ वर्.षि॑यसे च॒ नमो॑ वृ॒द्धाय॑ च स॒म् ँवृद्ध्व॑ने च॒

नमो॒ अग्रि॑याय च प्रथ॒माय॑ च॒ नम॑ आ॒शवे॑ चाजि॒राय॑ च॒

नमः॒ शीघ्रि॑याय च॒ शीभ्या॑य च॒ नम॑ ऊ॒र्म्या॑य चावस्व॒न्या॑य च॒

नमः॑ स्रोत॒स्या॑य च॒ द्वीप्या॑य च ॥ 5

षष्ठोऽनुवाकः

नमो᳚ ज्ये॒ष्ठाय॑ च कनि॒ष्ठाय॑ च॒ नमः॑ पूर्व॒जाय॑ चापर॒जाय॑ च॒

नमो॑ मद्ध्य॒माय॑ चापग॒ल्भाय॑ च॒ नमो॑ जघ॒न्या॑य च॒ बुद्ध्नि॑याय च॒

नम॑स्सो॒भ्या॑य च प्रतिस॒र्या॑य च॒ नमो॒ याम्या॑य च॒ क्षेम्या॑य च॒

नम॑ उर्व॒र्या॑य च॒ खल्या॑य च॒ नम॒श्श्लोक्या॑य चावसा॒न्या॑य च॒

नमो॒ वन्या॑य च॒ कक्ष्या॑य च॒ नम॑श्श्र॒वाय॑ च प्रतिश्र॒वाय॑ च॒

नम॑ आ॒शुषे॑णाय चा॒शुर॑थाय च॒ नमः॒ शूरा॑य चावभिन्द॒ते च॒

नमो॑ व॒र्मिणे॑ च वरू॒थिने॑ च॒ नमो॑ बि॒ल्मिने॑ च कव॒चिने॑ च॒

नमः॑ शृ॒ताय॑ च शृतसे॒नाय॑ च ॥ 6

सप्तमोऽनुवाकः

नमो॑ दुन्दु॒भ्या॑य चाहन॒न्या॑य च॒ नमो॑ धृ॒ष्णवे॑ च प्रमृ॒शाय॑ च॒

नमो॑ दू॒ताय॑ च॒ प्रहि॑ताय च॒ नमो॑ निष॒ङ्गिणे॑ चेषुधि॒मते॑ च॒

नम॑ स्ती॒क्ष्णेष॑वे चायु॒धिने॑ च॒ नमः॑ स्वायु॒धाय॑ च सु॒धन्व॑ने च॒

नम॒स्सृत्या॑य च॒ पथ्या॑य च॒ नमः॑ का॒ट्या॑य च नी॒प्या॑य च॒

नमः॒ सूद्या॑य च सर॒स्या॑य च॒ नमो॑ ना॒द्याय॑ च वैश॒न्ताय॑ च॒

नमः॒ कूप्या॑य चाव॒ट्या॑य च॒ नमो॒ वर्ष्या॑य चाव॒र्ष्याय॑ च॒

नमो॑ मे॒घ्या॑य च विद्यु॒त्या॑य च॒ नम॑ ई॒द्ध्रिया॑य चात॒प्या॑य च॒

नमो॒ वात्या॑य च॒ रेष्मि॑याय च॒ नमो॑ वास्त॒व्या॑य च वास्तु॒पाय॑ च ॥ 7

अष्टमोऽनुवाकः

नमः॒ सोमा॑य च रु॒द्राय॑ च॒ नम॑स्ता॒म्राय॑ चारु॒णाय॑ च॒

नम॑श्श॒ङ्गाय॑ च पशु॒पत॑ये च॒ नम॑ उ॒ग्राय॑ च भी॒माय॑ च॒

नमो॑ अग्रेव॒धाय॑ च दूरेव॒धाय॑ च॒ नमो॑ ह॒न्त्रे च॒ हनी॑यसे च॒

नमो॑ वृ॒क्षेभ्यो॒ हरि॑केशेभ्यो॒

नम॑स्ता॒राय॒

नम॑श्श॒भंवे॑ च मयो॒भवे॑ च॒

नम॑श्शङ्क॒राय॑ च मयस्क॒राय॑ च॒ नम॑श्शि॒वाय॑ च शि॒वत॑राय च॒

नम॒स्तीर्थ्या॑य च॒ कूल्या॑य च॒ नमः॑ पा॒र्या॑य चावा॒र्या॑य च॒

नमः॑ प्र॒तर॑णाय चो॒त्तर॑णाय च॒ नम॑ आता॒र्या॑य चाला॒द्या॑य च॒

नम॒श्शष्प्या॑य च॒ फेन्या॑य च॒ नमः॑ सिक॒त्या॑य च प्रवा॒ह्या॑य च ॥ 8

नवमोऽनुवाकः

नम॑ इरि॒ण्या॑य च प्रप॒थ्या॑य च॒ नमः॑ किꣳशि॒लाय॑ च॒ क्षय॑णाय च॒

नमः॑ कप॒र्दिने॑ च पुल॒स्तये॑ च॒ नमो॒ गोष्ठ्या॑य च॒ गृह्या॑य च॒

नम॒ स्तल्प्या॑य च॒ गेह्या॑य च॒ नमः॑ का॒ट्या॑य च गह्वरे॒ष्ठाय॑ च॒

नमो᳚ ह्रद॒य्या॑य च निवे॒ष्प्या॑य च॒ नमः॑ पाꣳस॒व्या॑य च रज॒स्या॑य च॒

नमः॒ शुष्क्या॑य च हरि॒त्या॑य च॒ नमो॒ लोप्या॑य चोल॒प्या॑य च॒

नम॑ ऊ॒र्व्या॑य च सू॒र्म्या॑य च॒ नमः॑ प॒र्ण्या॑य च पर्णश॒द्या॑य च॒

नमो॑ऽपगु॒रमा॑णाय चाभिघ्न॒ते च॒ नम॑ आक्खिद॒ते च॑ प्रक्खिद॒ते च॒

नमो॑ वः किरि॒केभ्यो॑ दे॒वाना॒ꣳ॒ हृद॑येभ्यो॒ नमो॑ विक्षीण॒केभ्यो॒

नमो॑ विचिन्व॒त्केभ्यो॒ नम॑ आनिर्.ह॒तेभ्यो॒ नम॑ आमीव॒त्केभ्यः॑ ॥ 9

दशमोऽनुवाकः

द्रापे॒ अन्ध॑सस्पते॒ दरि॑द्र॒न्नील॑लोहित ।

ए॒षां पुरु॑षाणामे॒षां प॑शू॒नां मा भे र्माऽरो॒ मो ए॑षां॒ किञ्च॒नाम॑मत् । 10.1

या ते॑ रुद्र शि॒वा त॒नूश्शि॒वा वि॒श्वाह॑भेषजी ।

शि॒वा रु॒द्रस्य॑ भेष॒जी तया॑ नो मृड जी॒वसे᳚ । 10.2

इ॒माꣳ रु॒द्राय॑ त॒वसे॑ कप॒र्दिने᳚ क्ष॒यद्वी॑राय॒ प्रभ॑रामहे म॒तिं ।

यथा॑ नः॒ शमस॑द्-द्वि॒पदे॒ चतु॑ष्पदे॒ विश्वं॑ पु॒ष्टं ग्रामे॑ अ॒स्मि-न्नना॑तुरं । 10.3

मृ॒डा नो॑ रुद्रो॒ तनो॒ मय॑स्कृधि क्ष॒यद्वी॑राय॒ नम॑सा विधेम ते ।

यच्छञ्च॒ योश्च॒ मनु॑राय॒जे पि॒ता तद॑श्याम॒ तव॑ रुद्र॒ प्रणी॑तौ । 10.4

मा नो॑ म॒हान्त॑मु॒त मा नो॑ अर्भ॒कं मा न॒ उक्ष॑न्तमु॒त मा न॑ उक्षि॒तं ।

मा नो॑ वधीः पि॒तरं॒ मोत मा॒तरं॑ प्रि॒या मा न॑स्त॒नुवो॑ रुद्र रीरिषः । 10.5

मा न॑स्तो॒के तन॑ये॒ मा न॒ आयु॑षि॒ मा नो॒ गोषु॒ मा नो॒ अश्वे॑षु रीरिषः ।

वी॒रान्मानो॑ रुद्र भामि॒तोव॑धीर्. ह॒विष्म॑न्तो॒ नम॑सा विधेम ते । 10.6

आ॒रात्ते॑ गो॒घ्न उ॒त पू॑रुष॒घ्ने क्ष॒यद्वी॑राय सु॒म्न-म॒स्मे ते॑ अस्तु ।

रक्षा॑ च नो॒ अधि॑ च देव ब्रू॒ह्यधा॑ च नः॒ शर्म॑ यच्छद्वि॒बर्.हाः᳚ । 10.7

स्तु॒हि शृ॒तं ग॑र्त्त॒सदं॒ ँयुवा॑नं मृ॒गन्न भी॒म-मु॑पह॒त्नु-मु॒ग्रं ।

मृ॒डा ज॑रि॒त्रे रु॑द्र॒ स्तवा॑नो अ॒न्यन्ते॑ अ॒स्मन्निव॑पन्तु॒ सेनाः᳚ । 10.8

परि॑णो रु॒द्रस्य॑ हे॒तिर् वृ॑णक्तु॒ परि॑त्वे॒षस्य॑ दुर्म॒तिर॑घा॒योः ।

अव॑ स्थि॒रा म॒घव॑द्भ्य-स्तनुष्व॒ मीढ्व॑स्तो॒काय॒ तन॑याय मृडय । 10.9

मीढु॑ष्टम॒ शिव॑तम शि॒वो न॑स्सु॒मना॑ भव ।

प॒र॒मे वृ॒क्ष आयु॑धन्नि॒धाय॒ कृत्तिं॒ ँवसा॑न॒ आच॑र॒ पिना॑कं॒ बिभ्र॒दाग॑हि । 10.10

विकि॑रिद॒ विलो॑हित॒ नम॑स्ते अस्तु भगवः ।

यास्ते॑ स॒हस्रꣳ॑ हे॒तयो॒ऽन्य-म॒स्मन्निव॑पन्तु॒ ताः । 10.11

स॒हस्रा॑णि सहस्र॒धा बा॑हु॒वोस्तव॑ हे॒तयः॑ ।

तासा॒मीशा॑नो भगवः परा॒चीना॒ मुखा॑ कृधि ॥ 10 ॥10.12

एकादशोऽनुवाकः

स॒हस्रा॑णि सहस्र॒शो ये रु॒द्रा अधि॒ भूम्यां᳚ ।

तेषाꣳ॑ सहस्रयोज॒ने ऽव॒धन्वा॑नि तन्मसि । 11.1

अ॒स्मिन्-म॑ह॒त्य॑र्ण॒वे᳚-ऽन्तरि॑क्षे भ॒वा अधि॑ । 11.2

नील॑ग्रीवाः शिति॒कण्ठाः᳚ श॒र्वा अ॒धः क्ष॑माच॒राः । 11.3

नील॑ग्रीवा-श्शिति॒कण्ठा॒ दिवꣳ॑ रु॒द्रा उप॑श्रिताः । 11.4

ये वृ॒क्षेषु॑ स॒स्पिञ्ज॑रा॒ नील॑ग्रीवा॒ विलो॑हिताः । 11.5

ये भू॒ताना॒-मधि॑पतयो विशि॒खासः॑ कप॒र्दिनः॑ । 11.6

ये अन्ने॑षु वि॒विद्ध्य॑न्ति॒ पात्रे॑षु॒ पिब॑तो॒ जनान्॑ । 11.7

ये प॒थां प॑थि॒रक्ष॑य ऐलबृ॒दा य॒व्युधः॑ । 11.8

ये ती॒र्त्थानि॑ प्र॒चर॑न्ति सृ॒काव॑न्तो निष॒ङ्गिणः॑ । 11.9

य ए॒ताव॑न्तश्च॒ भूयाꣳ॑सश्च॒ दिशो॑ रु॒द्रा वि॑तस्थि॒रे ।

तेषाꣳ॑ सहस्रयोज॒ने ऽव॒धन्वा॑नि तन्मसि । 11.10

नमो॑ रु॒द्रेभ्यो॒ ये पृ॑थि॒व्यां ँये᳚ऽन्तरि॑क्षे॒ ये दि॒वि येषा॒मन्नं॒ ँवातो॑

व॒र्॒.षमिष॑व॒स्-तेभ्यो॒ दश॒ प्राची॒ र्दश॑दक्षि॒णा दश॑प्र॒तीची॒र्

दशोदी॑ची॒र् दशो॒द्‌र्ध्वा-स्तेभ्यो॒ नम॒स्ते नो॑ मृडयन्तु॒ ते यं द्वि॒ष्मो

यश्च॑ नो॒ द्वेष्टि॒ तं ँवो॒ जंभे॑ दधामि ॥ 11 (11.11 )

त्र्यंबकादि महामन्त्रः

TS 1.8.6.2 for 1 / TS 5.5.9.3 for 2 / RV.5.42.11 for 3 / RV 10.60.12 for 4 /

TB 3.10.8.2 for 5 / T.A.6.58.1 for 6/ T.A.6.75.1 & T.A.6.74.1

for 7 )

त्र्यं॑बकं ँयजामहे सुग॒न्धिं पु॑ष्टि॒वद्‌र्ध॑नं ।

उ॒र्वा॒रु॒कमि॑व॒ बन्ध॑नान् मृ॒त्योर् मु॑क्षीय॒ माऽमृता᳚त् ॥ 1

यो रु॒द्रो अ॒ग्नौ यो अ॒फ्सु य ओष॑धीषु॒ यो रु॒द्रो विश्वा॒

भुव॑ना ऽऽवि॒वेश॒ तस्मै॑ रु॒द्राय॒ नमो॑ अस्तु ॥ 2

तमु॑ष्टु॒हि यः स्वि॒षुः सु॒धन्वा॒ यो विश्व॑स्य॒ क्षय॑ति भेष॒जस्य॑ ।

यक्ष्वा᳚म॒हे सौ᳚मन॒साय॑ रु॒द्रं नमो᳚भिर्-दे॒वमसु॑रं दुवस्य ॥ 3

अ॒यं मे॒ हस्तो॒ भग॑वान॒यं मे॒ भग॑वत्तरः ।

अ॒यं मे᳚ वि॒श्व-भे᳚षजो॒यꣳ शि॒वाभि॑मर्.शनः ॥ 4

ये ते॑ स॒हस्र॑म॒युतं॒ पाशा॒ मृत्यो॒ मर्त्या॑य॒ हन्त॑वे ।

तान्. य॒ज्ञस्य॑ मा॒यया॒ सर्वा॒नव॑ यजामहे ॥ 5

मृ॒त्यवे॒ स्वाहा॑ मृ॒त्यवे॒ स्वाहा᳚ ॥ 6

ॐ नमो भगवते रुद्राय विष्णवे मृत्यु॑र्मे पा॒हि ॥

प्राणानां ग्रन्थिरसि रुद्रो मा॑ विशा॒न्तकः । तेनान्नेना᳚प्याय॒स्व ॥ 7

नमो रुद्राय विष्णवे मृत्यु॑र्मे पा॒हि ॥

ॐ शान्तिः॒ शान्तिः॒ शान्तिः॑ ॥